Pune: दोन्ही राष्ट्रवादीच्या आघाडीची घोषणा का होत नाही? आतली बातमी फुटली

उपमुख्यमंत्री अजित पवार आणि शरद पवार यांच्या राष्ट्रवादीच्या नेत्यांची खासगीत चर्चा सुरू आहे. अजित पवार यांनीही काही नेत्यांना फोन करून आघाडीसंदर्भातील मते जाणून घेतली. काही नेते आघाडीला अनुकूल आहेत. मात्र प्रशांत जगताप यांच्यासारखे नेते आणि काही पदाधिकारी भाजप सोबत असलेल्या अजित पवार यांच्याशी आघाडी होऊ नये या मताचे आहेत. असे असले तरी आघाडीची घोषणा चिन्हाबाबतच्या संभ्रमामुळे थांबली असल्याची माहिती विश्वसनीय सूत्रांनी दिली आहे.

दोन्ही राष्ट्रवादी एकत्र येताना उमेदवारांनी घड्याळ चिन्हावरच लढावे, असे अजित पवार यांच्या पक्षाचे म्हणणे आहे. दोन्ही पक्षाच्या उमेदवारांनी घड्याळाच्या चिन्हावर पुणे आणि पिंपरी चिंचवड महापालिका निवडणुकीला सामोरे जावे, अशी चर्चा झाल्याची माहिती आहे. मात्र या निर्णयाला शरद पवार यांच्या पक्षातील काहींचा विरोध आहे. असे झाले तर अजित पवार यांच्या राष्ट्रवादीत प्रवेश केल्यासारखेच होईल, असे त्यांना वाटते. आघाडीपर्यंत ठीक आहे पण तुतारी चिन्हाबाबत समझोता करणार नाही, या निर्णयावर ठाम असल्याचे शरद पवार यांच्या राष्ट्रवादीतील एका नेत्याने नाव न छापण्याच्या अटीवर सांगितले.

राष्ट्रवादी काँग्रेस पक्षाच्या कार्याध्यक्ष आणि खासदार सुप्रिया सुळे यांनी पुण्यामध्ये दुपारी पत्रकार परिषद घेतली. या पत्रकार परिषदेत अजित पवार यांच्या राष्ट्रवादीशी आघाडी होणार असल्याचे थेटपणे संकेत त्यांनी दिले. पुणे शहराचा विकास डोळ्यासमोर ठेवून आणि कार्यकर्त्यांची निवडणूक असल्याने त्यांच्याही भावना लक्षात घेऊन आम्ही निर्णय घेणार आहोत असे सांगत अजित पवार यांच्या पक्षासोबत होत असलेले आघाडीचे त्यांनी समर्थन केले. पण त्याचवेळी अद्यापपर्यंत कोणताही निर्णय घेतलेला नाही, असेही त्यांनी आवर्जून सांगितले.

दुसरीकडे, राष्ट्रवादीचे निष्ठावान पदाधिकारी, पुण्याचे माजी महापौर प्रशांत जगताप यांनी पक्षाची पुरोगामी भूमिका ठसवून सांगण्याचा प्रयत्न करीत सद्वविवेक बुद्धीला स्मरून राजीनामा देत असल्याचे जाहीर केले. अजित पवार हे भारतीय जनता पक्षासोबत सत्तेत बसले आहेत. त्यामुळे त्यांच्याशी आघाडी नको अशी भूमिका त्यांनी घेतली होती. मात्र त्यांची ही भूमिका पक्षातील नेत्यांना मान्य न झाल्याने त्यांनी पक्षातून बाहेर पडण्याचा निर्णय घेतला.