"दादांची जागा कुणीच घेऊ शकत नाही", सुनेत्रा पवारांच्या शपथविधीवर रोहित पवारांचं परखड मत

आता या सगळ्या घडामोडीवर शरद पवार गटाचे आमदार आणि अजित पवारांचे पुतणे रोहित पवार यांनी प्रतिक्रिया दिली आहे. अजितदादांची जागा कुणीच घेऊ शकत नाही. पण सुनेत्रा काकींमध्ये आम्ही अजित दादांना पाहतो, असं वक्तव्य रोहित पवार यांनी केलं आहे. आज बारामतीसह संपूर्ण राज्यात जिल्हा परिषद आणि पंचायत समितीसाठी मतदान घेतलं जात आहे. रोहित पवारांनीही बारामतीत मतदान केलं. यावेळी पत्रकारांशी संवाद साधताना त्यांनी राष्ट्रवादीचं अध्यक्षपद आणि सुनेत्रा पवारांचा शपथविधी यावर सविस्तर भाष्य केलं.

मागील काही दिवसांत पवार कुटुंबीयांच्या झालेल्या बैठकांच्या पार्श्वभूमीवर राष्ट्रवादीचा राष्ट्रीय अध्यक्ष कोण होणार? याबाबत पवार कुटुंबात काही चर्चा झाली आहे का? असा सवाल विचारला असता रोहित पवार म्हणाले, "याबाबत काहीही चर्चा झाली नाही. जेव्हा ही दु:खद घटना घडली. तेव्हा काही दिवस आम्हाला काहीही सुचत नव्हतं. आमच्या डोक्यात कुठलाही राजकीय विचार येत नव्हता. पण मनात एक मात्र होतं की अजितदादांची जागा कुणीच घेऊ शकत नाही, पण सुनेत्राकाकींकडे बघत असताना, त्या एक परिवाराचा भाग म्हणून सुनेत्रा काकींमध्ये मी अजित काकांना बघतो."

"त्यामुळे त्यांना उपमुख्यमंत्रीपद मिळावं आणि अजित दादांकडील सर्व खाती त्यांना मिळावीत, अशी मनोमन इच्छा होती. तसेच त्या पक्षात अजित दादांची जी पोझीशन होती, म्हणजे ते राष्ट्रीय अध्यक्ष होते, हे पदही सुनेत्रा काकींनाच मिळाली पाहिजे, अशी देखील इच्छा माझ्या मनात आहे," असंही रोहित पवार म्हणाले.