जातीय आरक्षणावर RSS ची भूमिका काय? सरसंघचालक मोहन भागवत म्हणाले, जे संविधानानुसार...

राष्ट्रीय स्वयंसेवक संघाच्या शताब्दी वर्षानिमित्त (१०० वर्षे) राजधानी दिल्लीमध्ये विशेष व्याख्यानमालेचे आयोजन करण्यात आले आहे. सरसंघचालक मोहन भागवत यांनी व्याख्यानानंतर पत्रकारांशी संवाद साधला. यावेळी त्यांनी आरक्षणप्रश्नावर सखोल भाष्य केले.

मोहन भागवत म्हणाले,आरक्षण हा संवेदनांचा विषय आहे. ज्यांनी हजारो वर्षे जाच सहन केला, ज्यांचा अस्पृश्य म्हणवल्या जाणाऱ्या कुटुंबात जन्म झाला, त्ंयांचा विचार करा. त्यानंतर आरक्षणाचा प्रस्ताव संघात पारित झाला. संविधाननुसार जे आरक्षण मिळाले आहे, त्याला संघाचा पाठिंबा आहे. ही संघाची फार पूर्वीची भूमिका आहे, असे मोहन भागवत म्हणाले.

जातीय आरक्षणाच्या प्रश्नावर संघप्रमुख मोहन भागवत म्हणाले की, या विषयाकडे संवेदनशीलतेने पाहण्याची गरज आहे. दीनदयाल उपाध्यायांनी दिलेल्या दृष्टिकोनाचा उल्लेख करत त्यांनी सांगितले की जे खाली आहेत त्यांनी वर येण्यासाठी हात वर करायला हवा आणि जे वर आहेत त्यांनी त्यांचा हात धरून वर खेचायला हवे. संविधान मान्य आरक्षणाला संघाचा पूर्ण पाठिंबा असल्याचे भागवत यांनी स्पष्ट केले.

तसेच जातीबद्दल उच्च नीच भाव ज्या ग्रंथात असेल त्या ग्रंथांना संघ मानणार नाही. नवीन स्मृतीची निर्मिती करण्याची काळाची गरज आहे, असेही मोगन भागवत यांनी स्पष्ट केले.

भाजपा आणि आरएसएस यांच्यात मतभेद असल्याच्या प्रश्नावर संघप्रमुख मोहन भागवत यांनी स्पष्ट केले की “मतभेदाचे मुद्दे काही असू शकतात, पण मनभेद अजिबात नाहीत. आमचा एकमेकांवर विश्वास आहे. भाजपा सरकारमध्ये सर्व काही आरएसएस ठरवते ही गोष्ट पूर्णपणे चुकीची आहे. असे होऊच शकत नाही, कारण लक्ष्य एकच आहे, आपल्या देशाचे भले, असे भागवत यांनी अधोरेखित केले.