कॉलेजचा ‘अ‍ॅन्युअल डे’, वादळ आलं अन् मंडप कोसळला, सांगलीचा थरकाप उडवणारा Video Viral

वार्षिकोत्सव कार्यक्रमाचा पहिला दिवस होता. प्रसिद्ध मराठी स्टँडअप कॉमेडियन सौरभ भोसले यांचा धमाल शो झाला. त्यानंतर दुपारी चारच्या दरम्यान कॉलेजमधील विद्यार्थ्यांच्या विविध गुणदर्शनाचा कार्यक्रम सुरू झाला. विद्यार्थ्यांकडून मिळालेल्या माहितीनुसार कार्यक्रमास सुरुवात होऊन अर्ध्या तासातच सोसाट्याच्या वाऱ्याला सुरुवात झाली आणि मंडप हलू लागले. वाऱ्याची गती लक्षात घेता मंडपातील सगळे विद्यार्थी शिक्षक यांनी मंडपाच्या बाहेर कॉलेजच्या इमारतीमध्ये निवाऱ्याला धाव घेतली.

क्षणातच जोरदार वादळ आले आणि मोकळ्या मैदानावर उभारलेला भव्य मंडप कोसळू लागला. सुदैवाने सगळे पटकन इमारतीमध्ये पोहोचल्याने कोणालाही इजा झाली नाही. सगळे सुखरूप असून व्यवस्थापकांकडून कार्यक्रम त्याच ठिकाणी स्थगित करण्यात आला. उर्वरित कार्यक्रम आणि नियोजनानुसार दुसऱ्या दिवशीचा कार्यक्रम मोकळ्या मैदानावर संपन्न होणार असल्याचे समजत आहे.