Santosh Deshmukh : धनंजय देशमुखांच्या पाठोपाठ जरांगेंना मोठा संशय, पुण्यातून राजकीय पाठबळ...नेमका रोख कुणावर?

परभणीत मनोज जरांगे पाटील यांनी माध्यमांना प्रतिक्रिया दिली आहे. यावेळी सुदर्शन घुले आणि सुधीर सांगळे यांना यांच्या अटकेवर बोलतान जरांगे म्हणाले की, पुण्यातून का अटक होतेय. सगळेच आरोपी पुण्यातून का सापडतात, असा संशय त्यांनी व्यक्त केला आहे. तसेच याचा अर्थ सरकारचा आणि सरकारमधील कुठल्या तरी मंत्र्याचा यांना राजकीय पाठबळ आहे, असा गंभीर आरोप जरांगे यांनी केला.

संतोष देशमुख हत्या प्रकरणात सुदर्शन घुले प्रमुख आरोपी आहे तर सुधीर सांगळे हा सहआरोपी आहेत.या दोघांनाही पोलिसांनी ताब्यात घेतलं आहे. खरं तर सुत्रांकडून मिळालेल्या माहितीनुसार सुदर्शन घुले आणि सुधीर सांगळे, कृष्णा आंधळे हे दोन दिवस भिवंडीमध्ये होते. सरपंचाची हत्या केल्यानंतर तब्बल 25 दिवसांनी हे आरोपी फरारी होते. अखेर त्या तीन फरार आरोपींपैकी सुदर्शन घुले आणि सुधीर सांगळेला अटक करण्यात पोलिसांना यश आले आहे. हे दोन आरोपी भिवंडीनंतर पुण्यात गेले होते. त्यामुळे पोलिसांनी या दोघांना पुण्यातून अटक केली आहे. यासोबत संतोष देखमुख यांचं लोकेशन देणारा एक संशयितही पोलिसांनी पकडल्याची माहिती मिळाली आहे.

दरम्यान मस्साजोग सरपंच संतोष देशमुख यांच्या मारेकरूंना लवकरात लवकर अटक करून कडक शिक्षा देण्याच्या मागणीसाठी आज परभणीमध्ये महामोर्चाचे आयोजन करण्यात आले आहे. या मोर्चासाठी मराठा आरक्षण आंदोलक मनोज जरांगे पाटील यांच्यासह, बीड लोकसभा खासदार बजरंग सोनवणे, आमदार सुरेश धस, आमदार संदीप क्षीरसागर, यांच्यासह अनेक नेतेमंडळी ही राहणार उपस्थित राहणार आहेत.