आस्मानी संकट आलं अन् होत्याचं नव्हतं झालं! काही मिनिटांत शेतकऱ्याचं 12 लाखांचं नुकसान!

शेतकरी दत्तात्रय विठोबा कदम यांची पापरी येथे दीड एकरात केळीची शेती आहे. दत्तात्रय कदम यांनी एक केळीचे रोप 25 रुपये प्रमाणे 2200 रोपांची दीड एकरात लागवड केली. लागवड, औषध फवारणी असा सगळा खर्च मिळून त्यांना 55 हजार रुपयांचा खर्च आला होता. तर दहा महिन्यात केळीचे व्यवस्थापन करण्यासाठी दीड लाख रुपयांपर्यंत खर्च झाले. जवळपास दोन ते अडीच लाख खर्चून जपलेली बाग अचानक आलेल्या वादळात आडवी झाली.

ऐन उन्हाळ्यात पाण्यासाठी कसरत करून केळीची बाग जोपासली. परंतु, काही मिनिटांत आलेल्या वादळानं हातातोंडाशी आलेला घास ओढून नेला. दीड एकर केळीची बाग भूईसपाट झाली. केळीची बाग उद्ध्वस्त झाल्यने कदम यांचे 10 ते 12 लाख रुपयांचे नुकसान झाले आहे. घातलेला खर्चही निघणार नसल्याने शेतकरी अडचणीत असून कदम यांनी मदतीची मागणी केली आहे.