महाराष्ट्रावर दुहेरी संकट! दक्षिणेकडून येतंय वादळ, विकेण्डला कसं राहणार हवामान, घराबाहेर जाण्याआधी IMD चा अलर्ट पाहा

हवामान विभागाने दिलेल्या माहितीनुसार, महाराष्ट्रात पुढील २४ तासांपर्यंत तापमानात फारसा बदल जाणवणार नाही. मात्र, त्यानंतर हळूहळू थंडीचा जोर वाढण्यास सुरुवात होईल. प्रामुख्याने विदर्भ आणि उत्तर महाराष्ट्रात किमान तापमानात २ ते ३ अंशांची घट होण्याचा अंदाज आहे. मध्य महाराष्ट्र आणि मराठवाड्यातही रात्रीचा गारवा वाढणार असून, पहाटेच्या वेळी काही जिल्ह्यांत धुक्याचे सावट पाहायला मिळू शकते.

हवामान खात्याने स्पष्ट केले की, दक्षिण-पश्चिम बंगालच्या उपसागरात निर्माण झालेले Deep Depression सध्या उत्तर-पश्चिम दिशेला सरकत आहे. हे १० जानेवारीच्या सुमारास श्रीलंका किनारपट्टी ओलांडण्याची शक्यता आहे. या प्रणालीमुळे दक्षिण भारतात मुसळधार पावसाचा इशारा देण्यात आला.

महाराष्ट्राच्या शेजारील राज्यांमध्ये, विशेषतः राजस्थान आणि मध्य प्रदेशात प्रचंड मोठी कोल्ड वेव आली आहे. याचा परिणाम म्हणून सातपुडा पर्वत रांगांच्या परिसरातून येणारे थंड वारे खान्देश आणि विदर्भातील हुडहुडी वाढवणार आहेत. उत्तराखंड आणि हिमाचल प्रदेशात होणाऱ्या बर्फवृष्टीमुळे राज्यातील थंडीचा कडाका १४ जानेवारीपर्यंत कायम राहण्याचा अंदाज आहे.