Job News: ठाण्याच्या कळवा रुग्णालयात 293 पदांसाठी भरती; थेट मुलाखतीवर मिळणार संधी

कळवा येथील छत्रपती शिवाजी महाराज रुग्णालयात गेल्या वर्षी ऑगस्ट महिन्यात एकाच रात्रीत 18 रुग्णांचे अचानक मृत्यू झाले. त्यामुळे पालिकेच्या आरोग्य विभागातील त्रुटींबाबत टीका करण्यात आली. या घटनेनंतर मुख्यमंत्री एकनाथ शिंदे यांनी रुग्णालयाला भेट देऊन या गंभीर घटनेची समितीमार्फत सखोल चौकशी करण्याचे आदेश दिले होते. मात्र, कळवा रुग्णालयातील यंत्रणेवर येणारा ताण लक्षात घेऊन 293 पदांसाठी भरतीप्रक्रिया करण्याचा निर्णय ठाणे पालिका प्रशासनाने घेतला आहे. कंत्राटी पद्धतीने एकत्रित वेतनावर 6 महिने (179 दिवस) कालावधीसाठी भरती केली जाणार आहे. या भरती प्रक्रियेची ठाणे पालिका प्रशासनाने जाहिरात प्रसिद्ध केली आहे.

26 फेब्रुवारी ते 01 मार्चपर्यंत भरती प्रक्रिया सुरू राहणार आहे. यामध्ये विविध पदांसाठी प्रत्येक दिवस मुलाखत फेरीसाठी नेमून दिला आहे. पात्र व इच्छुक उमेदवारांनी पाचपाखाडी येथील ठाणे पालिका मुख्यालयाच्या तिसऱ्या मजल्यावर नमूद पदाच्या व संबंधित संवर्गासाठी दिलेल्या दिवशीच उपस्थित राहावे, असे आवाहन पालिका प्रशासनाने केले आहे.