सुंदर रंगीबेरंगी पणत्या अन् दिवे, फक्त 5 रुपयांपासून, ठाण्यात कुठं कराल खरेदी?

ठाणे : दिवाळीचा उत्साह मार्केटमध्ये ओसंडून वाहत आहे. दिवाळी म्हटलं की येते पणत्या आणि दिव्यांची रोषणाई. हल्ली मातीच्या पणत्यांमध्ये सुद्धा अनेक वेगवेगळे प्रकार आलेले आहेत. सध्या ठाणे मार्केटमध्ये मोठ्या प्रमाणात दिवे आणि पणत्या उपलब्ध झाल्या आहेत. यंदा ठाण्यात वेगवेगळ्या प्रकारच्या पणत्या पाहायला मिळत आहेत. या पणत्यांमध्ये श्रीराम लिहिलेला पणत्या, त्यासोबत हँगिंग पणत्या, मोर, हत्ती आणि हंस यांचा आकार असणारे दिवे आणि पणत्या मार्केटमध्ये उपलब्ध झाले आहेत. ठाणे मार्केटमध्ये पणत्यांची किंमत फक्त 5 रुपयांपासून ते 500 रुपयांपर्यंत आहे. अनेक जण घर सजवण्यासाठी रांगोळीवर ठेवण्यासाठी या पणत्यांचा उपयोग करतात.

ठाण्यातील राम मारुती रोड इथे असणाऱ्या रोज नर्सरी या ठिकाणी साध्या गोल मातीच्या पणत्या फक्त 5 रुपयांपासून सुरू होतात. त्याचसोबत, यांच्याकडे वेगवेगळ्या व्हरायटीमध्ये पणत्या उपलब्ध झाल्या आहेत. यामध्ये हँगिंग पणत्या विशेष करून लोकांचे लक्ष वेधून घेत आहेत. गॅलरीमध्ये लावण्यासाठी हा एक उत्तम पर्याय आहे. यांची किंमत फक्त 100 रुपयांपासून सुरू होत आहे.