Shivsena vs Shivsena: शिवसेना ठाकरेंची का शिंदेंची? जनतेच्या न्यायालयात फैसला, या 51 ठिकाणी थेट सामना!

खरी शिवसेना कोणती? याचा निर्णय विधानसभा निवडणुकीत होणार आहे. 89 मतदारसंघातील निकाल सत्तासंघर्षात महत्त्वाचे ठरणार आहेत. विधानसभा निवडणुकीच्या निकालासोबतच शिवसेनेचा निकाल जनतेच्या न्यायालयात लागणार आहे. शिवसेना आणि एनसीपी या दोन पक्षात फूट पडली होती. त्यानंतर हा वाद सुप्रीम कोर्टात पोहोचला होता. मात्र सुप्रीम कोर्टात अजून या खटल्याचा निकाल लागलेला नाही. तर निवडणुकीच्या रणांगणात दोन्ही शिवसेना आणि दोन्ही एनसीपी आमनेसामने येणार आहेत.

शिवसेना आणि शिवसेना ठाकरे गट 51 मतदारसंघात लढताहेत. शिवसेना आणि शिवसेना ठाकरे गटात मुंबई, ठाणे, कोकण आणि मराठवाड्यात लढत होतेय. वरळी, माहीम, रत्नागिरी, ठाणे, संभाजीनगर, धाराशिवसह 51 मतदारसंघातील निकाल खरी शिवसेना कुणाची? याचा कौल देणार आहेत. मुख्यमंत्री एकनाथ शिंदेंसमोर त्यांच्यासोबतच्या 40 आमदारांना निवडून आणण्याचं आव्हान असणार आहे. परिणामी अब्दुल सत्तार, संजय शिरसाट, तानाजी सावंत, संतोष बांगर, संजय राठोड, उदय सामंतांसह शिवसेनेच्या सर्व उमेदवारांचा निकाल पक्षासाठी महत्त्वाचा असणार आहे.

एकंदरीतच 23 नोव्हेंबर ही तारिख महत्त्वाची ठरणार आहे. कारण 23 तारखेला राज्यात कुणाचं सरकार येणार, हे स्पष्ट होणार आहे. तसंच कोणती शिवसेना खरी, याचा फैसलाही त्याच दिवशी राज्यातील जनता करणार आहे.