केंद्र सरकारकडून पगार, पेंशन वाढीची घोषणा; 'एरियर'ची तारीख ठरली, इतके पैसे जमा होणार; अर्थ मंत्रालयाने दिली अपडेट

या निर्णयाचा लाभ सार्वजनिक क्षेत्रातील सामान्य विमा कंपन्या, ग्रामीण बँका, नाबार्ड तसेच भारतीय रिझर्व्ह बँक (RBI) मधील कर्मचारी आणि निवृत्त पेंशनधारकांना मिळणार आहे. हा बदल मागील तारखेपासून लागू केला जाणार असून, मोठा हिस्सा थकबाकी (एरियर) स्वरूपात दिला जाणार आहे.

अर्थ मंत्रालयानुसार सार्वजनिक क्षेत्रातील सामान्य विमा कंपन्या आणि राष्ट्रीय कृषी व ग्रामीण विकास बँक (नाबार्ड) यांच्या कर्मचाऱ्यांच्या वेतन सुधारणा प्रस्तावाला केंद्र सरकारने हिरवा कंदील दिला आहे. त्याचबरोबर RBI आणि नाबार्डमधील निवृत्त कर्मचाऱ्यांच्या पेंशनमध्येही सुधारणा मंजूर करण्यात आली आहे. विमा कंपन्यांच्या कर्मचाऱ्यांसाठी ही वेतन सुधारणा 1 ऑगस्ट 2022 पासून लागू होणार आहे.

सार्वजनिक क्षेत्रातील सामान्य विमा कंपन्यांच्या वेतन सुधारणेसाठी एकूण 8,170.30 कोटी रुपयांचा खर्च अपेक्षित आहे. यामध्ये वेतन थकबाकीपोटी 5,822.68 कोटी रुपये, राष्ट्रीय पेन्शन प्रणाली (NPS) साठी 250.15 कोटी रुपये आणि कुटुंबीय पेंशनसाठी 2,097.47 कोटी रुपयांचा समावेश आहे.

पेंशन सुधारणा लागू झाल्यानंतर नाबार्डमधील 269 पेंशनधारक आणि 457 कुटुंबीय पेंशनधारकांना एकरकमी 50.82 कोटी रुपयांची थकबाकी मिळणार आहे. याशिवाय पेंशनच्या मासिक खर्चात सुमारे 3.55 कोटी रुपयांची वाढ होणार आहे.

या पेंशन सुधारणेमुळे एकूण 2,696.82 कोटी रुपयांचा आर्थिक भार सरकारवर येणार आहे. यामध्ये 2,485.02 कोटी रुपये थकबाकी स्वरूपात एकरकमी दिले जाणार असून, वार्षिक खर्चात 211.80 कोटी रुपयांची अतिरिक्त वाढ होणार आहे.