EPFO असलेल्या कर्मचाऱ्यांसाठी गुडन्यूज! UPI वापरून काढता येणार पैसे, कधी लागू होणार नियम पाहा

श्रम मंत्रालय एका विशेष प्रोजेक्टवर काम करत असून, या अंतर्गत सदस्यांना त्यांच्या अकाउंटवरील जमा असलेली रक्कम पाहता येईल आणि ही रक्कम थेट UPI पिन टाकून ट्रान्सफर करता येईल. ज्याप्रमाणे आपण गुगल पे किंवा फोन पे वरून पैसे पाठवतो, तितक्याच सहजतेने आता पीएफचे पैसे मिळवता येणार आहेत.

सध्या पीएफचे पैसे काढण्यासाठी क्लेम फॉर्म भरावा लागतो. ऑटो सेटलमेंटमुळे ही प्रक्रिया तीन दिवसांवर आली असली, तरी त्यासाठी अर्ज करणे बंधनकारक असते. मात्र, नवीन UPI प्रणालीमुळे वारंवार क्लेम दाखल करण्याची झंझट कायमची संपू शकते. वर्षाला साधारण ५ कोटींहून अधिक क्लेम हाताळणाऱ्या EPFO वरील कामाचा ताणही यामुळे कमी होणार आहे.

ऑक्टोबर २०२५ मध्ये पीएफच्या नियमात मोठे बदल करण्यात आले आहेत. आता आजारपण, शिक्षण, लग्न किंवा घरासाठी तुम्ही तुमच्या आणि मालकाच्या हिशाची १०० टक्के रक्कम काढू शकता. मात्र, सदस्याच्या सुरक्षित भविष्यासाठी खात्यात किमान २५ टक्के रक्कम शिल्लक ठेवावी लागेल, जेणेकरून निवृत्तीनंतरचं आर्थिक सुरक्षा कवच कायम राहील आणि त्यावर ८.२५% व्याजाचा लाभही मिळत राहील.