Gold Rate Today : नवरात्रीच्या पहिल्याच दिवशी सोन्याने लय भाव खाल्ला, दरात मोठी उसळी, आजचा भाव वाचून पोटात गोळा येईल

डोनाल्ड ट्रम्प यांच्या बदलत्या धोरणांमुळे सोन्याच्या भावात गेल्या वर्षभरापासून सातत्याने वाढ होत असताना दिसत आहे. सोन्याच्या भावात तब्बल 24 तासात दोन हजार रुपयांची वाढ झाली आहे. आजचा सोन्याचा भाव जीएसटी सह एक लाख 16 हजार आहे.यातच ग्राहक संभ्रमात असल्याचे चित्र पाहायला मिळत आ.सोन्याच्या वाढत्या भावामुळे सोने खरेदी करताना ग्राहकांना कुठेतरी खरेदी करताना काटकसर करावी लागत आहे.त्यामुळे ग्राहकांमध्ये नाराजी देखील पाहायला मिळत आहे.

सोन्याचे भाव कमी व्हावे असे सर्वसामान्य ग्राहकांची मागणी असून मात्र डोनाल्ड ट्रम्प यांच्या धोरणांमुळे व नॅशनल बँकांच्या व्याजदर कमी होत असल्याने आगामी काळातही सोन्याचे भाव वाढण्याची शक्यता सोने तज्ञांनी वर्तवली आहे.

जळगावच्या सुवर्णनगरीत दररोज सोन्याचे भाव वाढत असल्याचे चित्र दिसून येत आहे.शनिवारी 20 सप्टेंबरला 10 ग्रॅम सोन्याचा दर 1 लाख 14 हजार 300 रूपये (जीएसटीसह) इतका नोंदवला गेला. अल्पावधीत भावामध्ये झालेली ही वाढ ग्राहकांसाठी धोक्याची घंटा समजली जात आहे.

ग्राहकांकडून काही प्रमाणात वेट अँड वॉच ही भूमिका घेतली जात असली तरी नवरात्र,दसरा आणि दिवाळीसारखे मोठे सण तोंडावर आल्याने खरेदी टाळणे अनेकांसाठी शक्य नाही. त्यामुळे भाव वाढले तरी ग्राहकांचा ओघ कायम असल्याचे सुवर्ण व्यवसायिकांनी सांगितले.

सोन्याचे भाव खूपच वाढले आहेत. आणि हे भाव आता आमच्या अवाक्याबाहेर चालले आहेत.त्यामु्ळे सर्वसामान्यांना सोनं घेणे आता परवडत नाही आहे.आम्ही जरी आज सोने घेण्यासाठी आलो असलो तरी आम्ही रिकामे हातच चाललोय कारण आमच्या बजेटमध्ये काहीच बसल नसल्याचे ग्राहक सुनिता पाटील यांनी सांगितले आहे.

जळगावमधील अग्रगण्य सुवर्णव्यवसायिकांच्या मते, अमेरिकन व्याजदर कपातीमुळे सोन्यातील गुंतवणूक वाढली आहे. आंतरराष्ट्रीय बाजारातील या चढउतारांचा थेट परिणाम जळगाव बाजारपेठेवर होत असून, भावात आणखी वाढ होण्याची शक्यता आहे.