Gold Reserve in Pakistan and India : खायचे वांदे असलेल्या पाकिस्तानकडे किती सोनं, भारताच्या एका मंदिरातही दुप्पट सोन्याचा साठा

अहवालानुसार, पाक रुपयाच्या सतत घसरणाऱ्या मूल्यामुळे चलनस्थैर्य राखण्यासाठी साठवलेले सोनं प्रभावी ठरत नाही. परकीय कर्जाचा डोंगर वाढत असून, IMF कडून आर्थिक मदत मिळवण्यासाठीही पाकिस्तानला आपल्या आर्थिक साखळीचा विश्वासार्ह अहवाल द्यावा लागतो. अशा वेळी फक्त 64 टन सोनं असणं, म्हणजे पाकिस्तानसाठी दिवाळखोरीच्या उंबरठ्यावर पोहोचल्यासारखं असल्याचे म्हटले जात आहे.

सोन्याचा साठा म्हणजे त्या देशाच्या आर्थिक बळकटीचा एक महत्त्वाचा भाग असतो. देशाचं चलन घसरू नये आणि त्याची किंमत टिकून राहावी म्हणून सरकार किंवा केंद्रीय बँका सोने राखून ठेवतात. सोन्याचा साठा जास्त असलेल्या देशांवर आंतरराष्ट्रीय वित्तीय संस्था, गुंतवणूकदार आणि देशांचा विश्वास अधिक असतो. युद्ध, महामारी, आर्थिक मंदी, किंवा इतर राष्ट्रीय संकटांवेळी सोनं विकून किंवा गहाण ठेवून परकीय चलन मिळवता येतं. त्यामुळे आर्थिक वादळात टिकून राहण्यासाठी सोन्याचा साठा 'बफर' म्हणून काम करतो.

अनेकदा देशांना आंतरराष्ट्रीय नाणेनिधी (IMF) किंवा जागतिक बँकेकडून कर्ज घ्यावं लागतं. अशावेळी सोन्याचा साठा असणे म्हणजे देशाची आर्थिक क्षमता दाखवण्याचा एक आधार ठरतो. देशाचा सोन्याचा साठा म्हणजे त्या देशाच्या राष्ट्रीय संपत्तीचा एक भाग असतो. GDP व्यतिरिक्त, ही भौतिक संपत्ती अर्थव्यवस्थेचं बळकटीकरण करते.