भाड्याच्या घरासाठी TDS चा मोदी सरकारने बदलला नियम, कसा होणार फायदा?

केंद्र सरकारचा 2025-26 या आर्थिक वर्षासाठीचा अर्थसंकल्प एक फेब्रुवारी 25 ला केंद्रीय अर्थमंत्री निर्मला सीतारामन यांनी संसदेत सादर केला. या बजेटकडून मध्यमवर्गाला मोठ्या अपेक्षा होत्या त्या पूर्ण करत सीतारामन यांनी 12 लाख रुपयांपर्यंत वार्षिक उत्पन्न असलेल्या नागरिकांना करातून सूट दिली आहे. त्याचबरोबर अनेक घोषणा करण्यात आल्या त्यापैकी एक म्हणजे भाडेतत्त्वावर दिलेल्या घराच्या मिळणाऱ्या भाड्यावरील टीडीएसमध्ये बदल करण्यात आला आहे. त्यामुळे ज्येष्ठ नागरिक आणि भाड्यातूनच कमाई करणाऱ्यांना खूप सोयीचं होणार आहे. सरकारने घरभाड्याच्या रकमेवरील टीडीएसची मर्यादा वार्षिक 2.4 लाख रुपयांवरून वाढवून 6 लाख रुपये केली आहे. अर्थमंत्री सीतारामन आपल्या बजेटच्या भाषणात म्हणाल्या होत्या की, या बदलामुळे TDS अंतर्गत होणाऱ्या ट्रॅन्झॅक्शनची संख्या कमी होईल. त्यामुळे लहान करदात्यांची सोय होईल. घराचा मालक आणि भाडेकरू या दोघांनाही या नव्या नियमाचा कसा फायदा होईल हे जाणून घेऊ या.