सर्वसामान्यांच्या खिशाला लागणार कात्री!100 रुपयांचा स्टँप झाला थेट पाचशेला

मुंबई : वैयक्तिक काही महत्त्वाची कामं असोत किंवा मग सरकारी कामं, सर्वांनाच स्टँपची गरज पडत असते. नागरिकांना फक्त 100 रुपयांच्या स्टँप पेपरवरून कागदपत्र तयार करता येत होती. 100, 200 आणि 500 रुपयांच्या स्टँपवर नागरिक आपली कागदपत्र तयार करत होते. मात्र आता 100 रुपयांचा स्टँप पेपर हा बंद होणार आहे. नोटरी करणं असो किंवा मग बँकेमधून कर्ज घ्यायचं असो या सर्वांसाठी हा 100 रुपयांचा स्टँप पेपर सर्वसामान्यांना कामी यायचा. मात्र आता सर्वसामान्यांच्या खिशाला कात्री बसणार आहे. कारण 100 रुपयांचा स्टँप पेपर आता बंद झाला आहे. आता कमीत कमी 500 रुपयांच्या स्टँपवरच खरेदी, नोटरी, हक्क किंवा प्रतिज्ञापत्र देण्यात येणार आहेत.

यापूर्वी फक्त यांनाच द्यावे लागत होते 500 रुपये यापूर्वी सर्वसामान्य नागरिकांना केवळ 100 किंवा 200 रुपये द्यावे लागत होते. मात्र कंपन्यांच्या एकत्रीकरण, विलनीकरण किंवा भविष्यात कोणतेही मतभेद मिटवताना लेखी निर्णय देण्यात येतो. कंपन्यांचं भागभांडवल हे मोठं असतं. याच कारणामुळे त्यांना स्थावर आणि जंगम मालमत्तेप्रकरणी अभिहस्तांतरणात 500 रुपये मोजावे लागतात. मात्र आता सर्वसामान्यांनाही 500 रुपयेच मोजावे लागतील.