शेअर मार्केटमध्ये महाक्रॅश, काही मिनिटांत कोट्यवधींचा चुराडा, सोन्या चांदीने छप्पर फाडलं, पुढे काय?

'मनी कंट्रोल'ने दिलेल्या वृत्तानुसार, गेल्या आठ महिन्यांतील सर्वात मोठ्या घसरणीनंतर आजही बाजार सावरू शकला नाही. शेअर मार्केटमध्ये मोठा क्रॅश आला. सकाळच्या सत्रातच सेंसेक्स जवळपास 1000 अंकांनी कोसळून ८१,२३५ वर आला, तर निफ्टी २८५ अंकांनी घसरून २५,००० च्या पातळीवर आली आहे. एका बाजूला शेअर बाजार रसातळाला जात असताना दुसरीकडे गुंतवणूकदारांनी आपला मोर्चा सोन्या-चांदीकडे वळवल्याने मौल्यवान धातूंनी विक्रमी उच्चांक गाठला आहे.

रुपयाचा ऐतिहासिक नीचांक- डॉलरच्या तुलनेत भारतीय रुपया ३१ पैशांनी कमकुवत होऊन ९१.२८ या आपल्या आतापर्यंतच्या सर्वात नीचांकी स्तरावर पोहोचला आहे. विदेशी गुंतवणूकदारांनी पैसे काढून घेतल्याचा थेट परिणाम चलनावर झाला आहे. रोज रुपयाचं मूल्य घसरत असल्याने आणि डॉलर जागतिक स्तरावर अधिक मजबूत होत असल्याने

विदेशी गुंतवणूकदारांची 'एक्झिट': परकीय संस्थागत गुंतवणूकदार जानेवारी महिन्यात सतत विक्री करत आहेत. जानेवारीत आतापर्यंत विदेशी गुंतवणूकदारांनी ३२,२५३ कोटी रुपये भारतीय बाजारातून बाहेर काढले आहेत.

अमेरिका-युरोप 'ट्रेड वॉर'ची भीती: राष्ट्राध्यक्ष डोनाल्ड ट्रम्प यांच्या ग्रीनलँड संदर्भातील आक्रमक धोरणांमुळे आणि युरोपीय देशांवर २५% टॅरिफ लावण्याच्या धमकीमुळे जागतिक बाजारात भीतीचे वातावरण आहे. यामुळे अमेरिकन बाजारासह आशियाई बाजारही लाल निशाणात आहेत.

तिमाही निकालांचा झटका: दिसंबर तिमाहीचे निकाल बाजाराच्या अपेक्षेप्रमाणे राहिलेले नाहीत. विशेषतः आयटी (IT) आणि बँकिंग क्षेत्रातील कंपन्यांच्या कमकुवत कामगिरीमुळे गुंतवणूकदारांचा विश्वास डगमगला आहे.

इंडिया VIX मध्ये मोठी वाढ: बाजारातील भीती दर्शवणारा 'इंडिया VIX' इंडेक्स ४ टक्क्यांनी वाढला आहे. याचा अर्थ असा की, येणाऱ्या काही दिवसांत बाजारात आणखी मोठी अस्थिरता किंवा घसरण पाहायला मिळू शकते.

सोन्या-चांदीकडे कल: जेव्हा शेअर बाजार कोसळतो, तेव्हा गुंतवणूकदार सुरक्षित पर्याय म्हणून सोन्या-चांदीकडे वळतात. चांदीने आज ३ लाख रुपये प्रति किलोचा टप्पा पार करून नवा इतिहास रचला आहे, तर सोन्याचे दरही कडाडले आहेत.

बाजार तज्ज्ञांच्या मते, जोपर्यंत जागतिक पातळीवरील भू-राजकीय तणाव निवळत नाही आणि रुपया स्थिर होत नाही, तोपर्यंत बाजारात मोठी तेजी येणे कठीण आहे. निफ्टीसाठी आता २४,८००० चा स्तर महत्त्वाची आधार पातळी असेल.