शेअर मार्केटमध्ये चुकीचा सल्ला देणं पडलं महागात, सेबीने ठोठावला पावणे तीन कोटींचा दंड

सेबी (SEBI) ने 7 जणांना 2.83 कोटी रुपयांचा दंड ठोठावला आहे. या 7 जण गुंतवणूकदारांना शेअर बाजारासंबंधी चुकीचा सल्ला देत होते, असा आरोप आहे. सेबीने गेल्या वर्षी 7 लोकांवर जवळपास 3 कोटी रुपयांचा दंड ठोठावला होता. दंड न भरल्याने आता त्यांना डिमांड नोटीस पाठवण्यात आली आहे. प्रदीप बैजनाथ पांड्या आणि इतर सात जण एका टीव्ही चॅनलवर शेअर बाजाराशी संबंधित कार्यक्रम सादर करत होते.

या सात जणांनी शेअर्समध्ये पैसे गुंतवावेत यासाठी गुंतवणूकदारांची दिशाभूल केली. त्यामुळे गुंतवणूकदारांचं मोठं नुकसान झालं. त्यानंतर या गुंतवणूकदारांनी न्याय मागितला. पांड्या यांच्याशिवाय तोशी ट्रेड, महान इन्व्हेस्टमेंट, मनीष वासनजी फुरिया (एचयूएफ), मनीष वासनजी फुरिया, अल्पा अल्पेश फुरिया, अल्पेश वासनजी फुरिया (एचयूएफ) आणि अल्पेश वासनजी फुरिया यांनाही दंड भरण्याची नोटीस पाठवण्यात आली आहे.

शेअर बाजारात गुंतवणूक करताना खूप काळजी घ्यावी. कोणत्याही व्यक्तीच्या सांगण्यावरून किंवा टीव्ही कार्यक्रमांवर आधारित गुंतवणूक करणे धोक्याचे असू शकते. गुंतवणूक करण्यापूर्वी स्वतः अभ्यास करणे आणि तज्ञांचा सल्ला घेणे आवश्यक आहे. अशा प्रकारे चुकीचे सल्ले देणं किंवा गुंतवणूकदारांची दिशाभूल करणं कायद्याने गुन्हा आहे. त्यामुळे अशा व्यक्तींविरोधात तातडीनं तक्रारही करायला हवी.