ग्रे मार्केटमधील गुंतवणूक किती लाभदायी? खरंच रिस्क घ्यावी का? पाहा तज्ज्ञांचा सल्ला

पुणे : आजकाल शेअर्स मार्केट मध्ये पैसे गुंतवणाऱ्यांचं प्रमाण वाढलं आहे. कमी पैसे गुंतवून अधिक नफा मिळवण्यासाठी अगदी तरुणांपासून ते वृद्धांपर्यंत सर्वजण शेअर मार्केटमध्ये पैसे गुंतवत आहेत. मात्र अनेकदा काही लोकांच्या सांगण्यामुळे आपण पैसे गुंतवतो आणि त्याचा फायदा आपल्याला मिळत नाही. बऱ्याचदा नुकसान देखील सहन करावं लागतं. शेअर मार्केट हे अनेकांना परिचयाचं झालं असलं तरी ग्रे मार्केट हा सुद्धा एक गुंतवणुकीचा प्रकार आहे. इथं गुंतवणूक कशी होते आणि त्याच्यात किती रिस्क असते? याबाबत पुण्यातील गुंतवणूक क्षेत्रातील जाणकार विनय नेर्लेकर यांच्याकडून जाणून घेऊ.

ग्रे मार्केट ही मुख्यत: वित्तीय रोख्यांची अनियंत्रित आणि अनधिकृत बाजारपेठ आहे. या बाजारातील व्यवहार हे साधारणपणे तेव्हा होतात जेव्हा एखादा समभागाचे बाजारातील व्यवहार काही कारणाने स्थगित अथवा निलंबित केलेले असतात. ग्रे मार्केटमधील व्यापारामध्ये खरेदीदार आणि विक्रेता यांच्यातील व्यापाराची सर्वस्वी जबाबदारी त्या दोघांवरच असते. त्यामुळे सौदा झालेल्या समभागाचा अधिकृत व्यापार सुरू होईपर्यंत यात जोखीम पत्करावी लागू शकते.