PSU Stock: सरकारी स्टॉक 13 टक्क्यांनी वधारले; एका आठवड्यात 24 टक्के रिटर्न मिळाले!

'मनीकंट्रोल'च्या वृत्तानुसार, सोमवारी सकाळी (9 डिसेंबर) या स्टॉकमध्ये 4 कोटींहून अधिक शेअर्सची देवाण-घेवाण झाल्याने दोन सत्रांत एकूण 12 कोटी शेअर्सची खरेदी-विक्री झाली आहे. या कंपनीला 19 नोव्हेंबर रोजी उत्तराखंड सरकारकडून एक ऑर्डर मिळाली होती. कंपनीला सरकारने उत्तराखंडच्या भूविज्ञान आणि खाण संचालनालयाने मायनिंग डिजिटल ट्रान्सफॉर्मेशन अँड मॉनिटरी सिस्टीम अर्थात एमडीटीएसएस प्रकल्पासाठी सुमारे 95 कोटी रुपयांचे कंत्राट दिले आहे. यानुसार कंपनी देहराडून, हरिद्वार, उधमसिंगनगर आणि नैनिताल जिल्ह्यात 40 चेक गेट्ससाठी एमडीटीएसएसच्या विकास, अंमलबजावणी आणि देखभालीसाठी एजन्सी म्हणून काम करेल.

नोव्हेंबर महिन्याच्या सुरुवातीला कंपनी भारतनेट फेज 3 प्रकल्पाच्या 3 पॅकेजेस साठी सर्वात कमी बोली लावणारी कंपनी होती. पॅकेजेसची किंमत एकूण 4559 कोटी रुपये होती. भारतनेट फेज -3 प्रकल्प देशातील सर्व राज्ये आणि केंद्रशासित प्रदेशातील 16 पॅकेजमध्ये विभागलेला आहे. बीएसएनएलने भारतनेट फेज -3 प्रकल्पाच्या मिडल माइल नेटवर्कचे डिझाइन, पुरवठा, इन्स्टॉलेशन, निर्मिती, अपग्रेडेशन, ऑपरेशन आणि देखभालीसाठी डिझाइन बिल्ट ऑपरेट अँड मेंटेन या मॉडेलसाठी निविदा मागविल्या होत्या.

`एनएसई`वर सोमवारी सकाळी पावणे अकरा वाजण्याच्या सुमारे कंपनीचे शेअर मागील बंदच्या तुलनेत 9 टक्के वधारत 361 रुपयांवर ट्रेडिंग करत होते. गेल्या आठवड्यात आयटीआय कंपनीच्या शेअर्समध्ये 24 टक्के तेजी आली.

आयटीआय लिमिटेड ही कंपनी या पूर्वी इंडियन टेलिफोन इंडस्ट्रीज लिमिटेड या नावाने ओळखली जात होती. भारतातील हे एक सेंट्रल पब्लिक सेक्टर युनिट आहे. हे दूरसंचार विभाग, दळणवळण मंत्रालय, भारत सरकारच्या मालकीचे आहे. 1948 मध्ये याची स्थापना झाली. त्याचे मुख्यालय बेंगळुरूत आहे. विकीपीडियानुसार, या कंपनीत 1000 पेक्षा जास्त कर्मचारी कार्यरत आहेत.