नाशकात 2 भावांनी सुरू केलं सी फूड रेस्टॉरंट, आईनंही दिली मोलाची साथ, महिन्याला 6 लाखांची कमाई

नाशिक - नाशिकच्या 2 भावांनी मिळून आपल्या आईच्या हाताचे जेवण नाशिकमध्ये प्रसिद्ध होण्यासाठी काही वर्षांपूर्वी एक इच्छा त्यांच्या आईकडे मांडली होती आणि आज मॉम्स कोकण कट्टा ह्या रेस्टोरंटच्या माध्यमातून ती पूर्ण सुद्धा झाली आहे. प्रवीण मोरे आणि आनंद मोरे हे दोन्ही भाऊ आणि आई आज नाशिकमध्ये हे हॉटेल चालवत आहे. तसेच या व्यवसायाच्या माध्यमातून ते महिन्याला 5 ते 6 लाख रुपयांपेक्षा जास्त रुपयांची कमाई करत आहेत. नेमकं त्यांनी हे यश कसं मिळवलं, याचबाबत लोकल18 च्या टीमने घेतलेला हा विशेष आढावा.

ते सांगतात की, पूर्वीपासून आई-वडील गावाकडे मासे विक्री करायचे. त्यानंतर आलेल्या पैशात ते आपले घर चालवत असत. आमच्या आईच्या हातालाही वेगळीच चव आहे. मोठे झाल्यावर आपल्या आईच्या हाताचे इतके चांगले आणि चविष्ट जेवण आपण नाशिककरांना खाऊ घातले तर त्यांना हे नक्कीच आवडेल. आमच्या मित्रांनाही ही कल्पना आवडली. आमच्या घरी अनेक वेळी आमचे मित्र जेवले असता त्यांनी आईच्या हाताच्या जेवणाचे कौतुक केले. त्यामुळे मित्रांना जेवण आवडत आहे, याचा अर्थ नाशिककरांनाही ते आवडेल या विचारातून 2012 मध्ये आम्ही आईच्या सोबतीने हा व्यवसाय सुरू केला.