बालपणी लिहिलेला निंबध गाजला, आता साहित्यिक पदापर्यंत झाला प्रवास, चतुरस्त्र व्यक्तिमत्त्व महेश काणेकरांसोबत विशेष संवाद, VIDEO

त्यांचा निर्मोही लघुकथासंग्रह, एका रम्य गावात हा ललित लेखसंग्रह, करामत बाल मूर्तिकाराची, आम्रवृक्ष माझा बाल मित्र हा कथासंग्रह, एक रविवार हौसेचा संस्कारक्षम कथासंग्रह, चिमण्यांची शाळा बाल कवितासंग्रह, स्वप्नाळू लाल्या प्रेरक बाल कथासंग्रह आदी साहित्य प्रकाशित झाले आहे. त्याशिवाय प्रामाणिक कमलाची गोष्ट प्रेरक कथासंग्रह, दोन मनांची गोष्ट (प्रेम या पवित्र नात्याचे भावनिक स्नेहचित्रण) व सुजाता (स्त्री जीवनाच्या चढउताराच्या दाहक आलेखाचा व्यापक वेध घेणारी कादंबरी लवकरच प्रकाशित होणार आहे.

विशेष उल्लेखनीय बाब म्हणजे जीवनातील अविस्मरणीय प्रसंग या लेखास साप्ताहिक विवेक आयोजित महाराष्ट्रात प्रथम क्रमांक मिळाला आहे. या शिवाय हुंडाविरोधी भित्तीपत्रक स्पर्धेत राज्यातून द्वितीय पुरस्कार, ढिश्यांव ढिश्यांव या दिवाळी अंकातील व्यंगचित्रास राज्यस्तरीय रौप्य पुरस्कार, अक्षरसिंधू या साहित्यिक चळवळीच्या माध्यमातून सिंधुदुर्ग जिल्ह्यात भरीव सांस्कृतिक व साहित्यिक कार्य केल्याबद्दल लळीत रंगभूमी पुणे, या संस्थेचा 1993 साली लळीत युवा पुरस्कार, जिल्हा ग्रामीण विकास यंत्रणा सिंधुदुर्ग आयोजित पोस्टर, रांगोळी व चित्रकला स्पर्धेत प्रथम क्रमांक, जागृती कला मंडळ वेंगुर्ले आयोजित तंटामुक्ती बोधकथा लेखन स्पर्धेत जिल्ह्यातून प्रथम क्रमांक असे अभिनंदनीय यश त्यांना मिळालेले आहे.

विशेष दखल घेण्यासारखी बाब म्हणजे त्यांच्या लघुकथा, बालकथा, वैचारिक लेख, कविता यांचे आकाशवाणीच्या रत्नागिरी केंद्रावर वाचन झालेले आहे. तसेच माझा गाव कणकवली या विषयावर त्यांची आकाशवाणीने मुलाखत घेतली आहे.