Mumbai : ट्रॅफिकची चिंता सोडा! आता मुंबईकर करतील अंडर ग्राऊंड प्रवास, 4 ठिकाणांसाठी BMC चा भन्नाट प्लॅन

बीएमसीचे अतिरिक्त आयुक्त अभिजीत बांगर यांनी दिलेल्या माहितीनुसार पूर्वेकडील एक्सप्रेस हायवेवरील अण्णाभाऊ साठे पुलाखाली एक्सेस कंट्रोलचे काम सुरू झाले आहे. तर पश्चिमेकडील एक्सप्रेस हायवेवर तीन ठिकाणी हे काम लवकरच सुरू होणार आहे. या ठिकाणांमध्ये बोरीवलीतील सुधीर फडके रोड, विलेपार्ले येथील हनुमान रोड आणि सांताक्रूझमधील मिलन सब-वे परिसराचा समावेश आहे.

'बॉक्स पुशिंग' ही अशी बांधकाम तंत्रज्ञान पद्धत आहे. ज्यात वाहतूक बंद न करता रस्त्याखाली अंडरपास तयार केला जातो. या पद्धतीत आधीच तयार केलेले आरसीसी बॉक्स मोठ्या जॅकच्या सहाय्याने जमिनीत पुढे ढकलले जातात. बॉक्स पुढे सरकताना त्यातील माती बाहेर काढली जाते आणि त्यामुळे वरचा रस्ता खुला राहतो.

या उपक्रमाचा मुख्य उद्देश म्हणजे नागरिकांना गाड्यांच्यामधून रस्ता ओलांडावा लागू नये आणि अपघातांची शक्यता कमी व्हावी हा आहे. नागरिकांना सुरक्षित आणि सुलभरीत्या हायवे ओलांडता यावा यासाठी या अंडरपासचा उपयोग होईल.