'50 घेऊन ये आणि तुझं काम करून जा', मंत्रालयात लाचखोरीचं स्टिंग ऑपरेशन, संपूर्ण VIDEO समोर

मुंबई : राज्याच्या विकास कामाबद्दल ज्या मंत्रालयात निर्णय घेतले जातात त्या वास्तूमध्ये लाचखोरीचा प्रकार समोर आल्यामुळे सर्वत्र संताप व्यक्त केला जात होता. राष्ट्रवादीचे नेते आणि अन्न व औषध प्रशासन विभागाचे मंत्री नरहरी झिरवळ यांच्या अंतर्गत विभागात हा प्रकार घडला होता. या प्रकरणी लिपिक राजू ढेरंगेला ACB ने ताब्यात घेतलं आहे. आता या लाचखोरीचं स्टिंग ऑपरेशन समोर आलं आहे.

अन्न व औषध प्रशासन मंत्री नरहरी झिरवळ यांच्या विभागात मंत्रालयामध्ये क्लर्क राजेंद्र ढेरंगेला 35 हजारांची लाच स्वीकारताना  लाचलुचपत विभागाच्या अधिकाऱ्यांनी 12 फेब्रुवारीला  रंगेहाथ पकडलं होतं.  आरोपी राजेंद्र ढेरंगेनं जेव्हा लाच स्वीकारली होती. त्यावेळीचं स्टिंग ऑपरेशन व्हिडीओ समोर आला आहे. तक्रारदाराने खिश्यामध्ये कॅमेरा ठेवला होता. या कॅमेऱ्यात ढेरंगे पैशाबद्दल बोलताना कैद झाला आहे  "50 घेऊन ये आणि तुझं काम करून घेऊन जा, कधी येणार सांग मला तसं तयारीत राहावं लागेल. साहेब येतील, पुढच्या हफ्त्यात यावं लागेल" असं ठेरंगे हा या व्हिडीओमध्ये बोलत आहे.

विशेष म्हणजे, तक्रारदार हरिराम घान जेव्हा या ढेरंगेला भेटले होते. त्यावेळी अन्न व औषध प्रशासन मंत्री नरहरी झिरवळ हे मंत्रालयात आपल्या केबिनमध्येच होते. या व्हिडीओमध्ये झिरवळ हे केबिनमधून बाहेर येत असल्याचं दिलं आहे.