MHADA Lottery: वरळीत म्हाडाचे 85 मजली टॉवर, लॉटरीत मिळणार 3333 फ्लॅट्स, किंमत पाहिली का?

वरळी, नायगाव आणि ना. म. जोशी मार्ग या तिन्ही भागांतील बीडीडी चाळींच्या पुनर्विकासाचे काम दोन टप्प्यांत होत आहे. त्यापैकी वरळी भागात 121 चाळीत राहणाऱ्या 9689 रहिवाशांचे पुनर्वसन करण्यासाठी 40 मजली एकूण 34 इमारती उभारल्या जात आहेत. या बांधकामानंतर म्हाडाला विक्रीयोग्य घरे उभारण्यासाठी मोठ्या प्रमाणात मोकळी जागा उपलब्ध झाली आहे.

म्हाडाने येथे एकूण पाच गगनचुंबी इमारतींची योजना तयार केली आहे. दोन टॉवर 58 मजली असतील. त्यामध्ये 1 बेसमेंट, 8 मजले पोडियम, 1 ई-डेक आणि 48 मजले निवासासाठी असणार आहेत. या टॉवरांची उंची सुमारे 192 मीटर असेल. उर्वरित तीन टॉवर 85 मजली असतील. यात 1 बेसमेंट, 8 मजले पोडियम, 76 मजले आलिशान फ्लॅट असतील. भव्य इमारतींची उंची तब्बल 300 मीटर असेल, ज्यामुळे ते मुंबईतील उंच इमारतींच्या यादीत अग्रस्थानी येतील.

या सर्व टॉवरांमध्ये मुंबईतील उच्चभ्रू निवासी प्रकल्पांप्रमाणे आधुनिक सुविधा उपलब्ध असणार आहेत. यामध्ये स्विमिंग पूल, अत्याधुनिक जिम, स्पा आणि क्लब हाऊस, मिनी थिएटर, सर्व फ्लॅटना बाल्कनी, सी फेस व्हिव्ह देणारी फ्लॅटची रचना, जोड फ्लॅट घेण्याचा पर्याय असेल. तसेच प्रत्येक फ्लॅटसाठी दोन स्वतंत्र पार्किंग देण्यात आली आहे. या सर्व सुविधांमुळे हे प्रकल्प मुंबईतील प्रीमियम रिअल इस्टेटमध्ये महत्त्वाचे स्थान मिळवतील.

पाचही टॉवरांमध्ये एकूण 3333 घरे म्हाडाला विक्रीसाठी मिळतील.

वरळी बीडीडी चाळींच्या पुनर्विकासामुळे या परिसराचा चेहरामोहरा पूर्णपणे बदलणार आहे. पुनर्वसन इमारतींसोबत प्रीमियम टॉवर उभारल्याने हा सारा भाग उच्चभ्रू निवासी पट्ट्यात परिवर्तित होणार आहे. जुन्या चाळ संस्कृतीच्या जागी आधुनिक, संरचनात्मकदृष्ट्या मजबूत आणि आलिशान निवासगृहे उभारली जाणार आहेत.