मुंबईत डॉक्टर तरुणीने संपवलं जीवन, DY Patil रुग्णालयात करत होती काम, मित्राला धरलं जबाबदार

मिळालेल्या माहितीनुसार, डॉ. स्तुती देशमाने या अँटॉप हिल येथील आपल्या घरी पालकांसोबत राहत होत्या. रविवारी रात्री आठच्या सुमारास स्तुतीचा तिच्या पालकांशी शेवटचा संवाद झाला होता. त्यानंतर ती आपल्या खोलीत गेली. सोमवारी सकाळी स्तुतीची एक मैत्रीण तिला वारंवार फोन करत होती, मात्र स्तुतीकडून कोणताही प्रतिसाद मिळत नव्हता. यामुळे तिने स्तुतीच्या पालकांना फोन केला.

पालकांनी स्तुतीच्या खोलीचा दरवाजा ठोठावला, परंतु आतून कोणतीही प्रतिसाद मिळाला नाही. यामुळे कुटुंबीयांनी काही शेजाऱ्यांच्या मदतीने दरवाजा तोडून आत प्रवेश केला असता, स्तुती गळफास घेतलेल्या अवस्थेत आढळली. हे दृश्य पाहून पालकांना मोठा धक्का बसला. हा प्रकार समोर आल्यानंतर स्थानिकांनी तातडीने घटनेची माहिती पोलिसांना दिली.

अँटॉप हिल पोलिसांनी घटनास्थळी धाव घेत तपास केला असता पोलिसांना स्तुतीच्या खोलीत एक सुसाईड नोट सापडली. या चिठ्ठीमध्ये तिने आपल्या वैयक्तिक आयुष्यात घडत असलेल्या काही घडामोडींना कंटाळून हे टोकाचं पाऊल उचलत असल्याचं नमूद केलं आहे. विशेष म्हणजे, तिने आपल्या मृत्यूला एका मित्राला जबाबदार धरलं आहे.

या सुसाईड नोटच्या आधारे पोलिसांनी संबंधित मित्राला तत्काळ ताब्यात घेतलं असून त्याची कसून चौकशी सुरू आहे. पोलिसांनी डॉ. स्तुतीचा मृतदेह शवविच्छेदनासाठी पाठवला असून अँटॉप हिल पोलीस ठाण्यात अपघाती मृत्यूची नोंद करण्यात आली आहे. रात्री उशिरापर्यंत या प्रकरणात गुन्हा नोंदवण्याची प्रक्रिया सुरू होती. वैयक्तिक आयुष्यातील तणावातून एका तरुण डॉक्टरने आपले जीवन संपवल्यामुळे हळहळ व्यक्त केली जात आहे. पोलीस आता त्या मित्रासोबत स्तुतीचे नेमके काय संबंध होते आणि तिला आत्महत्येसाठी प्रवृत्त करण्यात आले का, या दिशेने तपास करत आहेत.