Pune News: कोंडीचं टेन्शन संपणार, पुणेकरांचा वेळ वाचणार, ब्रिज अन् बोगद्यांचा मास्टर प्लॅन, कधी पूर्ण होणार?

महापालिकेच्या नियोजनानुसार पावसाळ्यापूर्वी काही महत्त्वाचे पूल पूर्ण करण्यावर भर दिला जाणार आहे. घोरपडी येथील रेल्वे पूल, आगाखान नदीवरील पूल तसेच सनसिटी कर्वेनगर येथील नदीवरील पूल यांची कामे पूर्ण करण्याचे नियोजन करण्यात आले आहे. मात्र काही ठिकाणी साइटवरील तांत्रिक अडचणींमुळे कामांमध्ये विलंब होत असल्याची माहितीही प्रशासनाने दिली आहे.

शहर विकास आराखड्यातील चार बोगदा प्रकल्पांपैकी पाषाण (पंचवटी) ते कोथरूड (सुतारदरा) आणि सिंहगड रोड (हिंगणे खुर्द) ते तळजाई चौक या दोन बोगदा प्रकल्पांना प्राधान्य देण्यात आले आहे. या दोन्ही प्रकल्पांच्या सविस्तर प्रकल्प अहवालासाठी (डीपीआर) अंदाजपत्रकात तरतूद करण्यात आली आहे. तसेच बालभारती ते पौड फाटा रस्त्याच्या कामासाठी सर्वोच्च न्यायालयाच्या आदेशानुसार पर्यावरणीय परवानग्या घेऊन लवकरच काम सुरू करण्याचे नियोजनही करण्यात आले आहे.

दरम्यान, प्रस्तावित मेट्रो प्रकल्पासोबत काही महत्त्वाच्या चौकांमध्ये उड्डाणपुलांचे एकत्रित नियोजन करण्यात येत आहे. कोथरूड बस डेपो चौक, आंबेडकर चौक (वारजे) आणि दांडेकर पूल चौक येथे मेट्रोसोबतच उड्डाण पुलांची उभारणी करण्याची योजना आखण्यात आली आहे. या सर्व प्रकल्पांमुळे शहरातील वाहतुकीची समस्या मोठ्या प्रमाणात कमी होईल, असा विश्वास महापालिका प्रशासनाने व्यक्त केला आहे.