झेंडूला सोन्याचं मोल! दसऱ्यामुळे मुंबईतील फूल बाजारात तेजी, किती मिळतोय भाव?

दसऱ्यामध्ये झेंडूच्या फुलांना बाजारात मोठ्या प्रमाणात मागणी असते. दरवर्षी बाजारात गोंडा 60 ते 70 रुपये किलोने विकला जातो. पण यंदा सलग दोन ते तीन दिवस पाऊस असल्यामुळे मुंबईच्या बाजारात गोंडा 150 ते 160 रुपये किलोने विकला जात आहे. दोन ते तीन दिवस पाऊस असल्यामुळे फुलांची आवक कमी झाली आहे. या आधी गोंडा 60 ते 80 रुपये किलो होता. आता आवक कमी असल्याने तोच गोंडा 150 ते 160 किलो झाल्याचे फुल विक्रेत्याकडून सांगण्यात आले.

झेंडू बरोबरच इतर फुलांच्या भावातही मोठी वाढ झालीये. मोगरा 1200 रुपये किलोने बाजारात विकला जात आहे. तर चाफा आज 400 रुपये शेकडा विकला जातोय. यंदा पावसामुळे फुलांचे मोठ्या प्रमाणात नुकसान झाले आहे. फूल उत्पादक शेतकऱ्यांना वाहतूक दळणवळण खर्च परवडत नाही. त्यामुळे यंदा फुलांच्या दरात तेजी असल्याचेही फूल व्यापाऱ्यांनी सांगितले.