Mumbai Goa Railway: गोव्याला जायचा प्लॅन बदला, मुंबईतून जाणाऱ्या 8 एक्स्प्रेस रद्द, ट्रेनचे मार्ग बदलले, कारण काय?

ब्लॉक कालावधीत काही महत्त्वाच्या लांब पल्ल्याच्या गाड्यांच्या फेऱ्यांवर परिणाम होणार आहे. शालिमार–वास्को दा गामा (18047/48), तिरुपती/हैदराबाद–वास्को (17419/20, 17021/22), सिकंदराबाद–वास्को (17039/40) तसेच जैसिदीह–वास्को (17321/22) या गाड्या संबंधित तारखांना वास्को ते हुबळी दरम्यान रद्द राहतील. परिणामी या गाड्यांचा प्रवास हुबळी येथेच आटोपता घेतला जाईल. परतीच्या फेऱ्या देखील हुबळी येथूनच नियोजित वेळेनुसार सुटतील. त्यामुळे गोवा, कर्नाटक आणि दक्षिण भारतात प्रवास करणाऱ्या हजारो प्रवाशांना पर्यायी व्यवस्था करावी लागणार आहे.

याशिवाय वास्को दा गामा–वेलंकन्नी (17315/16) या साप्ताहिक गाडीच्या मार्गातही बदल करण्यात आला आहे. ही गाडी मडगाव–मंगळुरू–शोरनूर–एरोड मार्गे धावेल. त्यामुळे हुबळी, धारवाड, दावणगेरे, तुमकूर आणि बेंगळुरू परिसरातील महत्त्वाचे थांबे वगळले जाणार आहेत. कोकण रेल्वे प्रशासनाने या बदलांची अधिकृत घोषणा केली आहे.

दीर्घकालीन देखभाल आणि सुरक्षिततेच्या दृष्टीने हे काम हाती घेण्यात आले असल्याचे रेल्वेने स्पष्ट केले आहे. मात्र पर्यटन हंगामातच हे बदल लागू झाल्याने प्रवाशांमध्ये नाराजी व्यक्त होत आहे. गोवा मार्गावरील तिकिटांची मोठी मागणी लक्षात घेता या निर्णयाचा व्यापक परिणाम होण्याची शक्यता आहे.

प्रवाशांनी प्रवासापूर्वी अधिकृत संकेतस्थळ, हेल्पलाइन किंवा संबंधित अॅपवर गाड्यांची अद्ययावत माहिती तपासूनच नियोजन करावे, असे आवाहन रेल्वे प्रशासनाने केले आहे. होणाऱ्या गैरसोयीबद्दल रेल्वेने दिलगिरीही व्यक्त केली आहे.