Cab Booking: आता प्रवाशांना मिळणार नुकसान भरपाई, कॅब चालकांना ती चूक महागात पडणार

कॅब बूक करून बऱ्याचदा प्रवासी गाडीची वाट पाहत असत. परंतु, अचानक चालकांनी बुकिंग रद्द केल्याचा मेसेज आल्यास त्यांना नाहक मनस्ताप सहन करावा लागतो. आता राज्य सरकारच्या निर्णयामुळे प्रवाशांना मोठा दिलासा मिळणार आहे.

आजपर्यंत प्रवाशांनी बुकिंग रद्द केल्यास केवळ त्यांनाच दंड ठोठावला जात होता. चालकांनी बुकिंग रद्द केल्यास हे नुकसान कॅब सेवा पुरवठा दार स्वत:च्या अंगावर घेत होते किंवा याकडे दुर्लक्ष केलं जात होतं. तसेच वाहन चालक परवडणारे भाडे देखील नाही म्हणत ते रद्द करत होते. आता या निर्णयामुळे कॅब चालकांनाही अचानक बुकिंग रद्द करणं महागात पडणार आहे. तसेच बुकिंग रद्द केल्यास प्रवाशांप्रमाणे कॅब कंपन्यांना देखील दंड भरावा लागेल.

प्रवाशांनी कार बुकिंग केल्यानंतर बुकिंग रद्द केल्यास त्यांना दंड ठोठावला जातो. मात्र या दंडाबाबत कार पुरवठादारांचे नियम व धोरण यात साम्यता आणि स्पष्टता नव्हती. नव्या धोरणात याबाबत देखील नियम निश्चित करण्यात आले आहेत. प्रवाशांनी बुकिंग रद्द केल्यावर बुकिंगनुसार प्रवास केल्यानंतर मिळणाऱ्या भाड्याच्या 50 टक्के किंवा 50 रुपये यापेक्षा जी रक्कम कमी असेल ती दंड म्हणून प्रवाशांकडून वसूल केली जाईल. तसेच हीच रक्कम संबंधित कार चालकाच्या खात्यात जमा केली जाईल, अशी तरतूद नव्या नियमात करण्यात आली आहे.