पनवेल-कर्जत प्रवास आता अवघ्या 40 मिनिटांत, कधी सुरु होणार मार्ग; वाचा संपूर्ण A टू Z माहिती

पनवेल-कर्जत रेल्वे कॉरिडोरचे काम अंतिम टप्प्यात आले असून प्रवाशांचा प्रतीक्षा काळ लवकरच संपण्याची शक्यता आहे. रेल्वे प्रशासनाच्या माहितीनुसार या प्रकल्पाचे सुमारे 85 टक्के काम पूर्ण झाले आहे. यंदाच्या वर्षाअखेरपर्यंत संपूर्ण काम पूर्ण करण्याचे उद्दिष्ट ठेवण्यात आले आहे.

या मार्गावर 5 रोड ओव्हर ब्रिज (आरओबी) आणि 15 रोड अंडर ब्रिजचे काम पूर्ण झाले आहे. सुरुवातीला पनवेल, चिखले, पोएंजे, चौक आणि कर्जत ही स्थानके या मार्गावर असतील. स्थानकांचे बांधकामही वेगाने सुरू आहे.

हा मार्ग सुरू झाल्यानंतर मध्य रेल्वे अंतर्गत सध्या सुरू असलेल्या छत्रपती शिवाजी महाराज टर्मिनस -कर्जत (कल्याणमार्गे) मार्गावरील प्रवासाचा वेळ कमी होणार आहे. पनवेल स्थानकावरून एस्केलेटरद्वारे थेट कर्जत लाईनला जाता येईल. सध्या रस्त्याने कर्जतला जाण्यास दीड तास लागतो, मात्र नवीन रेल्वेमुळे हे अंतर अवघ्या 40 मिनिटांत पार करता येणार आहे. नवी मुंबई आणि पनवेलमध्ये कामासाठी येणाऱ्या प्रवाशांना याचा मोठा फायदा होईल.