मुंबई-पुणे प्रवास; रक्तानं माखलेली कार अन् ते CCTV फुटेज, माळशेज घाटात प्रवाशाकडूनच Uber ड्रायव्हरची निर्घृण हत्या, तपासात धक्कादायक उलगडा

गुरुवारी (५ मार्च) रात्री नासिर अहमद यांनी टिटवाळा येथून जुन्नरसाठी एक राईड स्वीकारली. प्रवासी होता आदर्श चंद्रकांत भेलेराव (वय २१), जो आपल्या प्रेयसीला भेटण्यासाठी पुणे येथे जात होता. माळशेज घाटातील निर्मनुष्य भागात ही गाडी पोहोचली असता नासिर यांची हत्या करण्यात आली. शनिवारी पोलिसांना नासिर यांचा छिन्नविच्छिन्न अवस्थेतील मृतदेह घाटात आढळून आला.

शुक्रवारी सकाळी टिटवाळा-मुरबाड हायवेवर रक्ताने माखलेली एक अर्टिगा कार बेवारस अवस्थेत आढळली. गाडीच्या आत आणि बाहेर रक्ताचे सडे असल्याने सोशल मीडियावर याचे व्हिडिओ व्हायरल झाले आणि एकच खळबळ उडाली. टिटवाळा पोलिसांनी तांत्रिक तपास, उबेर ॲपचे रेकॉर्ड आणि सीसीटीव्ही फुटेजच्या मदतीने आरोपीचा शोध सुरू केला. एका पेट्रोल पंपावरील फुटेजमध्ये आरोपी रक्ताने माखलेली गाडी घेऊन डिझेल भरताना दिसला, ज्यावरून त्याचा माग लागला.

पोलिसी खाक्या दाखवताच आरोपी आदर्शने गुन्ह्याची कबुली दिली. "ड्रायव्हरने मला चाकू दाखवून लुटण्याचा प्रयत्न केला, म्हणून मी तोच चाकू हिसकावून त्याच्यावर वार केले," असा दावा त्याने केला आहे. नासिर यांची हत्या केल्यानंतर आरोपीने मृतदेह घाटात फेकून दिला आणि रक्ताने माखलेली गाडी टिटवाळ्यात सोडून तो घरी निघून गेला.