आवाज आला अन् धुरळा उडाला… गाढ झोपेत असताना विरारमध्ये इमारत कोसळली, एकच खळबळ

घटनेनंतर वसई-विरार महानगरपालिकेच्या अग्निशमन दलाच्या जवानांनी तातडीने घटनास्थळी धाव घेतली. सुरक्षेच्या दृष्टिकोनातून संपूर्ण इमारत रिकामी करून सर्व रहिवाशांना सुरक्षित स्थळी हलवण्यात आले. अग्निशमन दल आणि स्थानिक प्रशासनाने इमारतीची पाहणी करून पुढील कारवाईसाठी तयारी सुरू केली आहे.

या घटनेमुळे शहरातील धोकादायक इमारतींचा प्रश्न पुन्हा समोर आला आहे. वसई-विरार परिसरातील अनेक इमारती जुनाट अवस्थेत असून, काही इमारतींना महानगरपालिकेने ‘धोकादायक’ अशी यादीत नोंदवले आहे. मात्र नागरिकांना पर्यायी निवासाची सोय उपलब्ध नसल्याने, ते जीव मुठीत घेऊन अशा इमारतींमध्ये राहण्यास मजबूर आहेत.

स्थानिक नागरिकांनी प्रशासनावर निष्काळजीपणाचा आरोप केला आहे. "धोकादायक इमारतींचा प्रश्न केवळ नोटिसा लावून सुटत नाही. नागरिकांच्या सुरक्षेसाठी ठोस उपाययोजना करणे गरजेचे आहे," अशी मागणी स्थानिक रहिवाशांनी केली आहे. दरम्यान,महानगरपालिकेच्या अधिकाऱ्यांनी या इमारतीतील सर्व कुटुंबांना तात्पुरते पर्यायी निवास उपलब्ध करून दिला असून, कोसळलेल्या स्लॅबमुळे झालेल्या नुकसानीचा तपास सुरू आहे. या दुर्घटनेत मोठी जीवितहानी टळली असली तरी भविष्यातील धोके टाळण्यासाठी प्रशासनाने तत्काळ पावले उचलण्याची गरज आहे.