चहा प्यायली अन् तोल गेला, मुंबईत अकराव्या मजल्यावरून पडून महिलेचा मृत्यू

मिळालेल्या माहितीनुसार, झिनल व्होरा असं या महिलेचं नाव आहे. त्या न्यूयॉर्क स्थित इन्शुरन्स कंपनी मार्श अँड मॅकलेनमध्ये काम करत होत्या. घटनेच्या दिवशी 9 जानेवारीला त्या ऑफिसच्या अकराव्या मजल्यावर आपत्कालीन खिडकीजवळ चहा पित उभ्या होत्या. यावेळी अचानक त्यांचा तोल गेला आणि त्या दहाव्या मजल्याच्या गार्डन परिसरात कोसळल्या. या दुर्घटनेत त्यांच्या डोक्याला गंभीर दुखापत झाली. घटनेची माहिती मिळताच ऑफिसच्या सहकाऱ्यांनी तातडीने झिनल यांना हिरानंदानी रुग्णालयात दाखल केलं.

पण तिची प्रकृती अत्यंत चिंताजनक होती. डॉक्टरांनी झिनल यांना आयसीयूमध्ये दाखल करत उपचार सुरू केले. पण याचा काहीही फायदा झाला नाही. दुसऱ्या दिवशी सकाळी झिनल यांची प्राणज्योत मालवली. झिनल यांचा तीन वर्षांपूर्वी विवाह झाला होता. लग्नानंतर अवघ्या तीनच वर्षात त्यांचा संसार मोडला आहे. अशाप्रकारे झिनल यांचा मृत्यू झाल्याने मित्र परिवार आणि कुटुंबीयांना धक्का बसला आहे.