माटुंग्यात याठिकाणी मिळतं अगदी घरासारखं जेवण, दर अगदीच कमी, चवही भारी, विद्यार्थ्यांची होते चांगलीच गर्दी!

मुंबई : मुंबईसारख्या शहरात गावखेड्यातून अनेक विद्यार्थी शिकण्यासाठी, वेगवेगळे कोर्सेस करण्यासाठी येतात. हे विद्यार्थी एकतर हॉस्टेलमध्ये किंवा पीजीमध्ये राहत असल्यामुळे त्यांना व्यवस्थित घरचे अन्न मिळत नाही. त्यामुळे अशा विद्यार्थ्यांना चांगले घरगुती जेवण मिळावे, या उद्देशाने एका तरुणाने पुढाकार घेतला. विशाल सोनावणे असे या तरुणाचे नाव आहे. त्याने माटुंगा स्टेशन पासून फक्त 10 मिनिटांच्या अंतरावर असणाऱ्या रुईया कॉलेज समोरच त्याच्या काही मित्रांसोबत मिळून 'श्री स्वामी समर्थ लंच होम'ला सुरुवात केली.

विद्यार्थी खूप आशेने त्यांच्याकडे येतात. त्यामुळे त्यांना आवडेल आणि त्यांचे जेवून पोट आणि मन दोन्ही भरेल असेच अन्न विशाल आणि त्याची टीम मुलांना देतात. माटुंग्यात अनेक कॉलेजेस असल्यामुळे इथे मोठ्या प्रमाणात विद्यार्थ्यांची वर्दळ त्यामुळे साधारण 400 ते 500 मुलं रोज इथे जेवायला येतात.

स्वामी समर्थ लंच होममध्ये रोज तुम्हाला वेगवेगळ्या प्रकारच्या भाज्या मिळतील. यांची व्हेज थाळी फक्त 80 रुपयांना मिळते. यामध्ये तुम्हाला भात, दोन चपात्या, गरमागरम डाळ, दोन भाज्या, पापड किंवा तोंडी लावण्यासाठी कुरकुरे मिळतात. जेवणानंतर इथे स्वीटसुद्धा उपलब्ध असते.

दरम्यान, याठिकाणी फक्त विद्यार्थीच नाहीत तर कामाला जाणारे सुद्धा अनेक लोक येऊन पोटभर जेवण करतात. माटुंग्यातील श्री स्वामी समर्थ लंच होम हे उत्तम घरगुती आणि चविष्ट जेवणासाठी खूप प्रसिद्ध आहे. तुम्हालाही जर या घरगुती जेवणाची चव चाखायची असेल तर तुम्हीही या श्री स्वामी समर्थ लंच होमला भेट देऊ शकता.