Delhi Red Fort Blast : दिल्ली ब्लास्टच्या मागे ‘जैश-ए-मोहम्मद’ची महिला विंग? तपासात मसूद अझहरच्या बहिणीचं कनेक्शन समोर!

तपास यंत्रणांच्या माहितीनुसार, फरीदाबादमध्ये पकडलेली डॉ. शाहीना ही थेट दहशतवादी संघटना जैश-ए-मोहम्मद (Jaish-e-Mohammed) च्या महिला विंगची. जमात-उल-मोमीनात असं या महिला विंगचं नाव आहे. भारतातील प्रमुख म्हणून कार्यरत होती. तिला भारतात महिलांसाठीचे रिक्रूटमेंट जाळे उभे करण्याची आणि ते मजबूत करण्याची जबाबदारी देण्यात आली होती. या खुलाशाने दहशतवादी संघटना आता देशातील महिलांनाही लक्ष्य करत असल्याचं चित्र स्पष्ट झालं आहे.

जैश-ए-मोहम्मदच्या या महिला विंगचे मुख्य नेतृत्व पाकिस्तानमधून चालते. पाकिस्तानमध्ये 'जमात-उल-मोमीनात' (Jamaat-ul-Mominaat) या संघटनेचे नेतृत्व सादिया अझहर करते. सादिया अझहर ही जैश-ए-मोहम्मदचा संस्थापक मसूद अझहर याची सख्खी बहीण आहे. विशेष म्हणजे सादिया अझहरचा पती युसूफ अझहर हा देखील एक कुख्यात दहशतवादी असून तो कंधार विमान अपहरण प्रकरणातील प्रमुख सूत्रधारांपैकी एक होता. या सर्व माहितीमुळे आता जैशचे भारतातील सक्रिय महिला नेटवर्क किती मजबूत आहे, यावर तपास यंत्रणांनी आपली चौकशी अधिक तीव्र केली आहे.

दरम्यान, जम्मू आणि काश्मीर, हरियाणा आणि उत्तर प्रदेशमध्ये राबविलेल्या संयुक्त शोधमोहिमेदरम्यान प्रमुख दहशतवाद्यांसह 9 जणांना अटक करण्यात आली आहे. त्यांच्याकडून शस्त्रास्त्रे, दारूगोळा आणि स्फोटकांचा मोठा साठा जप्त करण्यात आला. यामध्ये 360 किलो स्फोटकांचा समावेश आहे. अटक केलेल्यांमध्ये एक मौलवी आणि एका महिलेसह 8 जणांचा समावेश आहे. दहशतवादी मॉड्यूलला मदत करणार्‍या डॉक्टर महिलेला लखनौमधून अटक करण्यात आली आहे. डॉ. शाहीन असे तिचे नाव आहे. तिच्या कारमधून एक एके-47 रायफल जप्त करण्यात आली आहे.

लाल किल्ला स्फोटानंतर तपास यंत्रणांनी सोशल मीडिया आणि मोबाइल डंप डेटा तपासणी मोहीम सुरू केली आहे. लाल किल्ल्याच्या आसपासच्या परिसरात ऑपरेट झालेल्या सर्व मोबाइल नंबरांचा डंप डेटा गोळा केला जात आहे. ज्या कारमध्ये स्फोट झाला, त्या वाहनाशी संबंधित नंबर कोणते होते, हे शोधण्यासाठी पार्किंग परिसरातील सर्व फोन डेटा तपासला जात आहे.