Indian Navy Jawan Arrest: भारतीय नौदलाचा जवानच निघाला 'ISI'चा एजंट! आग्रातून अटक, युद्धनौकांची गुपिते पाकिस्तानला विकली?

मिळालेल्या गोपनीय माहितीनुसार, युपी एटीएसने गेल्या काही दिवसांपासून इलेक्ट्रॉनिक सर्व्हिलन्सद्वारे एका संशयास्पद हालचालीवर लक्ष ठेवले होते. तपासाअंती, आग्र्याचा रहिवासी असलेला आदर्श कुमार हा पाकिस्तानमधील हँडलर्सच्या सतत संपर्कात असल्याचे निष्पन्न झाले. १० मार्च २०२६ रोजी एटीएसने सापळा रचून त्याला बेड्या ठोकल्या आणि न्यायालयात हजर केले, जिथून त्याला न्यायालयीन कोठडी सुनावण्यात आली आहे.

आरोपी आदर्श कुमार हा केरळमधील कोची येथील 'दक्षिण नेव्हल कमांड'मध्ये तैनात होता. नौदलात कार्यरत असताना त्याने काही माहिती आयएसआयला दिल्याचे समोर आले आहे. एटीएसनुसार,

त्याने भारतीय युद्धनौकांच्या (Warships) अत्यंत संवेदनशील फोटो पाकिस्तानला पाठवल्या. नौदलाच्या धोरणात्मक हालचालींची माहिती 'ISI' एजंटना पुरवली असून या बदल्यात त्याला मोठ्या प्रमाणावर आर्थिक लाभ मिळाल्याचा संशय आहे.

आरोपीकडून जप्त करण्यात आलेल्या मोबाईल आणि इलेक्ट्रॉनिक उपकरणांमध्ये अनेक धक्कादायक पुरावे मिळाले आहेत. पाकिस्तानमधील हस्तकांशी त्याचे असलेले चॅटिंग आणि शेअर केलेले फोटो देशाच्या सुरक्षेसाठी धोकादायक ठरू शकतात. एटीएस आता या प्रकरणाच्या मुळाशी जात असून, या रॅकेटमध्ये नौदलातील अजून कोणी सामील आहे का, याचा शोध घेत आहे.