भारताच्या दिव्यांग पॉवर लिफ्टरवर आली वाईट वेळ, उदरनिर्वाहासाठी करावं लागतंय 'हे' काम

एकेकाळी पॉवर लिफ्टिंगमध्ये भारताचे नाव उज्ज्वल करणारे पंजाबमधील दिव्यांग खेळाडू मनराज सिंगची, आज कुटुंबाच्या उदरनिर्वाहासाठी टायर पंक्चर काढण्याचे काम करीत आहेत. पंजाब ते राष्ट्रीय आणि आंतरराष्ट्रीय स्तरावर भारताचे प्रतिनिधित्व करणाऱ्या मनराज यांनी शेकडो पदक जिंकली आहेत. सध्या ते लुधियानापासून 20 किमी अंतरावर असलेल्या रायपूर बेट या छोट्याशा गावात आपल्या कुटुंबासह राहतात.

तरूणांनी ड्रग्जऐवजी खेळाकडे लक्ष द्यावे, असा प्रचार सरकार करत असताना दिव्यांग खेळाडूंसाठी सरकार काहीही करत नसल्याचे मनराज यांनी सांगितले. अपंग खेळाडू असूनही मनराज यांनी राष्ट्रीय आणि आंतरराष्ट्रीय स्तरावर पॉवर लिफ्टिंगमध्ये शेकडो विजय मिळवले आहेत. मात्र, त्यांना सरकारकडून प्रोत्साहन मिळालेले नाही. पदक जिंकून आले असताना सरकारचा एकही प्रतिनिधी त्यांच्या स्वागतासाठी आला नाही.

देशासाठी आणि राज्यासाठी चांगला खेळ दाखवणाऱ्या खेळाडूंना सरकारने आर्थिक मदत करावी, जेणेकरून तरुणांना चुकीच्या मार्गावर जाण्यापासून रोखता येईल असे मनराज सिंग यांनी सांगितले.