भारत पाकिस्तान युद्ध कसं थांबलं? अमेरिकेच्या उपराष्ट्राध्यक्षांचे 4 Missed Call... मोदींनी संसदेत सगळंच सांगितलं

नवी दिल्ली : पहलगाममध्ये धर्म विचारून निष्पाप नागरिकांना मारण्यात आले. मी २२ एप्रिल रोजी परदेशात होतो. परत आल्यावर मी एक बैठक बोलावली आणि दहशतवादाच्या सूत्रधारांना चोख उत्तर देण्यास सांगितले. दहशतवाद्यांना आणि त्यांच्या आकांना कल्पनेच्या पलीकडे शिक्षा करण्याचा आणि दहशतवाद्यांचा समूळ नायनाट करण्याचा संकल्प आम्ही केला. पुढील काही दिवसांतच देशाच्या सैन्याने अतिरेक्यांना धडा शिकवला. सैन्यदलाच्या कारवाईत काही मिनिटांतच पाकिस्तानचे दहशतवादी अड्डे उद्ध्वस्त झाले. पाकिस्तानच्या आगळीकीला भारताने चोख उत्तर दिले. अखेर आता आम्हाला हल्ले झेपत नाहीत, आम्ही उत्तर देऊ शकत नाही, असे पाकिस्तानने सांगितल्यानंतर आम्ही युद्ध थांबवले, असे पंतप्रधान नरेंद्र मोदी यांनी संसदेत सांगितले. त्याचवेळी जगातल्या कोणत्याच नेत्याच्या सांगण्यावरून आम्ही युद्धविराम केला नाही, असेही मोदी यांनी सांगितले.