राहुल गांधी यांना Z+ ASL सुरक्षा, परदेश दौऱ्याआधी सांगणं आवश्यक पण... गंभीर आरोप करणारं पत्र

सूत्रांच्या माहितीनुसार सीआरपीएफचे डीजी सिक्युरिटी यांनी १० सप्टेंबर रोजी काँग्रेस अध्यक्ष मल्लिकार्जुन खरगे आणि विरोधी पक्षनेते राहुल गांधी यांना पत्र लिहून तक्रार केली आहे. या पत्रात CRPF व्हीव्हीआयपी सिक्युरिटीचे प्रमुख सुनील जून यांनी राहुल गांधी सुरक्षा प्रोटोकॉलचे पालन करत नसल्याचा आरोप केला आहे. राहुल गांधींकडे Z+ with ASL सुरक्षा श्रेणी असून ते नियमांचे उल्लंघन करत असल्याचे नमूद केले आहे. राहुल गांधी हे 'यलो बुक प्रोटोकॉल' न पाळता विदेश दौऱ्यावर गेल्याची तक्रार पत्रात करण्यात आली आहे.

मल्लिकार्जुन खरगे आणि राहुल गांधी यांना तक्रार पत्र लिहून भविष्यात सुरक्षा प्रोटोकॉलची काळजी घेण्याचे आवाहन सीआरपीएफने केले आहे. पत्रात म्हटले आहे की, झेड प्लस एएसएल सुरक्षेने सुसज्ज असलेल्या व्हीआयपींना परदेश दौऱ्यावर जाण्यापूर्वी १५ दिवस आधी त्यांच्या सुरक्षा एजन्सीला माहिती देणे बंधनकारक आहे. परंतु राहुल गांधी परदेश दौऱ्यावर जाताना अजिबात सुरक्षा यंत्रणेला कळवत नाही, अशी तक्रार पत्रातून करण्यात आली आहे.

राहुल गांधी हे देशातील त्या मोजक्या व्हीव्हीआयपींपैकी एक आहेत जे अत्यंत संवेदनशील आहेत परंतु ते त्याचे प्रोटोकॉल पाळत नाहीत. सीआरपीएफच्या मते, राहुल गांधी गेल्या ९ महिन्यांत ६ वेळा सुरक्षा भंग करून परदेश दौऱ्यावर गेले आहेत. परंतु हे ६ परदेश दौरे सुरक्षा एजन्सीला न कळवता करण्यात आले ज्यामुळे सुरक्षा एजन्सीला मोठ्या समस्यांना तोंड द्यावे लागले आहे.

दरम्यान, गेल्या ९ महिन्यांत राहुल यांनी ६ परदेशी दौऱ्यांमध्ये सुरक्षा प्रोटोकॉलचे उल्लंघन केले आहे, असा आरोप पत्रात करण्यात आला आहे.

३० डिसेंबर २०२४ ते ९ जानेवारी दरम्यान इटलीचा पहिला दौरा.

नवीन वर्षात १०/११ दिवसांचा परदेश दौरा

१२ मार्च ते १७ मार्च दरम्यान व्हिएतनामचा दुसरा दौरा

१७ ते २३ एप्रिल दरम्यान दुबईचा तिसरा दौरा

११ ते १८ जून दरम्यान दोहा, कतारचा चौथा दौरा

२५ जून ते ६ जुलै दरम्यान लंडनचा पाचवा दौरा

४ ते ८ सप्टेंबर दरम्यान मलेशियाचा सहावा दौरा