'ए सिगरेट अन् दारू आण...' कॉलेजमध्ये रॅगिंगचा थरार; ज्युनियर्सवर लोखंडी सळ्या-दगडाने हल्ला

रॅगिंगचा हा अमानुष प्रकार १४ जानेवारी रोजी बेंगळुरू येथील आकाश ग्रुप ऑफ इन्स्टिट्यूशनमध्ये सुरू झाला. सीनियर्सनी प्रथम वर्षाच्या ज्युनियर विद्यार्थ्यांना गाठलं आणि त्यांना सिगरेट, दारू आणण्याच्या ऑर्ड्स सोडल्या. हे सगळं इथेच थांबलं नाही, तर ज्युनियर्सना स्वतःची पुस्तके वाहून नेण्यासही भाग पाडले गेले. जेव्हा विद्यार्थ्यांनी याला विरोध केला, तेव्हा त्यांना मारहाण करण्यात आली.

कॉलेज प्रशासनाने या प्रकाराची दखल घेत सुरुवातीला औपचारिक ताकीद दिली होती. मात्र, १५ जानेवारी रोजी हा वाद विकोपाला गेला. दोन ज्युनियर विद्यार्थ्यांनी सीनियर्सच्या मागण्या धुडकावून लावल्याचा राग मनात धरून, आरोपी विद्यार्थ्यांनी त्यांना लोखंडी सळ्या, दगड आणि लाकडी दांडक्यांनी बेदम मारहाण केली. या हल्ल्यात आरोपींनी एका विद्यार्थ्याच्या गळ्यातील सोन्याची साखळीही हिसकावून नेली. जेव्हा कॉलेजच्या कर्मचाऱ्यांनी मध्यस्थी करण्याचा प्रयत्न केला, तेव्हा आरोपींनी त्यांनाही सोडले नाही. ही धक्कादायक घटना कर्नाटकची राजधानी बेंगळुरूजवळील देवनहल्ली येथील आकाश ग्रुप ऑफ इन्स्टिट्यूशन या खाजगी कॉलेज कॅम्पसमध्ये घडली आहे.