Wedding Invitation : आग्रहाचे निमंत्रण! मतदानासाठी लग्न? हटके पत्रिकेनं वेधलं मतदारांचं लक्ष

मुंबई : जगातील सर्वांत मोठी लोकशाही असलेल्या भारतात सार्वत्रिक निवडणुकांना सुरुवात झालेली आहे. लोकसभा निवडणुकीसाठी 19 एप्रिलपासून देशभरात सात टप्प्यांमध्ये मतदान सुरू झालं आहे. 26 एप्रिल रोजी दुसऱ्या टप्प्यातील मतदान पार पडलं आहे तर तिसरा टप्पा येत्या 7 मे रोजी होणार आहे. त्यामुळे देशभरात निवडणुकीचं वारं वाहत आहे. नागरिकांनी मतदान करावं म्हणून त्यांना विविध मार्गांनी प्रोत्साहन दिलं जात आहे. नुकतंच मतदानाशी संबंधित एक अनोखी लग्नपत्रिका इंटरनेटवर व्हायरल होत आहे. ही लग्नपत्रिका पुणे शहरातून व्हायरल झाली आहे. लोकसभा निवडणुकीच्या काही दिवस आधी व्हायरल झालेली ही लग्नपत्रिका सध्या चांगलीच चर्चेत आहे. ही पत्रिका लग्नाचं आमंत्रण नसून मतदान करण्यासाठी दिलं गेलं आमंत्रण आहे.