'ते नसते, तर मी मेलो असतो', शूटिंग करणं जीवावर बेतलं; जितेंद्र जोशीसोबत घडला भयंकर प्रकार, थोडक्यात वाचला

मुंबई: मराठी सिनेसृष्टीतील अष्टपैलू अभिनेता जितेंद्र जोशी हा आपल्या प्रत्येक भूमिकेत जीव ओतण्यासाठी ओळखला जातो. पण कधीकधी हीच जिद्द कलाकाराच्या जीवावर बेतू शकते, याची प्रचिती नुकतीच आली आहे.

नवीन वर्षात म्हणजेच १ जानेवारी २०२६ रोजी प्रदर्शित झालेल्या ‘मॅजिक’ या चित्रपटाच्या शूटिंगदरम्यान जितेंद्रचा जीव थोडक्यात वाचला. एका फाशीच्या दृश्याचं चित्रीकरण सुरू असताना जितेंद्रच्या गळ्याला चक्क खराखुरा फास लागला आणि सेटवर एकच खळबळ उडाली.

चित्रपटाचे दिग्दर्शक रवी करमरकर आणि स्वतः जितेंद्रने एका मुलाखतीत या अंगावर काटा आणणाऱ्या प्रसंगाचा खुलासा केला. चित्रपटात जितेंद्रच्या पात्राला एक स्वप्न पडतं, ज्यामध्ये त्याला फाशी दिली जात असते.

या दृश्यासाठी सर्व तयारी झाली होती. जितेंद्रला फासावर लटकवण्यात आलं आणि त्याच्या पायाखाली एक स्टूल ठेवण्यात आलं होतं.

जितेंद्र सांगतो, "स्टंट मॅनने माझ्या मानेला फास लावला आणि मी त्या फासाला लटकलो होतो. दिग्दर्शकाने ॲक्शन म्हटलं आणि स्टूल काढलं गेलं. त्यानंतर काय झालं, मला काहीच आठवत नाहीये. मला फक्त इतकंच आठवतंय की मी झाडाला लटकलोय आणि लोक मला वाचवण्यासाठी ओरडत माझ्याकडे धावत येत आहेत. मधले काही क्षण माझ्या स्मृतीतून पूर्णपणे पुसले गेले आहेत."

दिग्दर्शक रवी करमरकर यांनी मॉनिटरवर हा सर्व प्रकार पाहिला. त्यांना क्षणार्धात जाणवलं की जितेंद्रला खरंच श्वास घ्यायला त्रास होतोय आणि त्याच्या हालचाली बदलल्या आहेत. रवींनी तात्काळ ओरडून शूटिंग थांबवलं. सर्व क्रू मेंबर्सनी धावत जाऊन जितेंद्रला खाली उतरवलं. जवळपास दोन मिनिटं जितेंद्रच्या गळ्याला घट्ट फास बसला होता.

"त्या दिवशी आम्ही शूट तिथेच थांबवलं. कारण चित्रपट पूर्ण होण्यापेक्षा जितू सुखरूप परत येणं आमच्यासाठी जास्त महत्त्वाचं होतं," असं रवी करमरकर यांनी सांगितलं.