मराठीत सुपरस्टार पण हिंदीत का मिळायचे फक्त नोकराचेच रोल! अशोक मामांनी सांगितली पडद्यामागची गोष्ट

मराठी चित्रपटसृष्टीचं नाव देशभरातच नव्हते तर जगभरात गाजवणारे पद्मश्री अशोक सराफ आणि दिवंगत अभिनेते लक्ष्मीकांत बेर्डे. दोघांची जोडी मराठीत हिट जोड्यांपैकी एक होती.

दोघांनी एकत्रितपणे अनेक मराठी सिनेमात काम केलं. दोघांनी अनेक हिंदी सिनेमातही काम केलं. हिंदी सिनेमातही त्यांनी त्यांची एक वेगळी ओळख निर्माण केली.

पण मराठीत सुपरस्टार असलेल्या या दोन्ही कलाकारांना हिंदीत मात्र अनेकदा नोकराच्या भूमिका मिळाल्या. याची खंत आजही अनेकांना आहे. पण असं का झालं याचं उत्तर स्वत: अशोक सराफ यांनी दिलं आहे.

अमुक तमुक या युट्यूब चॅनेलला दिलेल्या मुलाखतीत अशोक सराफ यांनी सांगितलं "मराठी लोकांची इमेज ही हिंदीत बसत नाही. त्यांच्या दृष्टीने हिरो म्हणजे गोरा पान...तो काम काय करतो हे कोणाला माहीत नसतं. आणि कोणाला कळतंही नाही. तसे तर आपण दिसत नाही. त्यामुळे आपल्याला हिरोचे रोल कधी मिळणार नाही. मग आपण कॅरेक्टर शोधतो."

अशोक सराफ पुढे म्हणाले, "माझ्यासारख्या किंवा लक्ष्मीकांत सारख्या चेहऱ्याला मग नोकराची भूमिका मिळते. त्याशिवाय काही मिळतच नाही. आता ते करायचं की नाही हे तुम्ही ठरवायचं असतं. जर तुम्हाला ते चांगले पैसे देत असतील, जर तुमचा फायदा होत असेल तर काहीच हरकत नाही. पण लोक काय म्हणतात यात अर्थ नाही. तिथे आम्ही हिरो म्हणून काम करणं हे होऊच शकत नाही. मग आम्ही कशाला हट्ट धरायचा."

अशोक मामांनी पुढे आणखी महत्त्वाची गोष्ट सांगितली, ते म्हणाले, "तुम्हाला जर वेळ असेल तर काम करा. मी हिंदीत तेव्हाच काम केलं जेव्हा मला वेळ असेल."

त्यांनी भोजपूरी सिनेमाचा किस्सा सांगितला, ते म्हणाला, "एक भोजपुरी प्रोड्युसर आला होता. मी कधी भोजपुरी केलेलं नाही. एक भूमिका होती. मी त्याला म्हटलं माझ्याकडे वेळ नाही. या 15 दिवसांत होत असेल तर बघ. तो म्हणाला हो चालेल. मी परफेक्ट त्यांची भाषा बोललोय. त्यांचा लेहेजा पकडला की तुम्ही भोजपुरी बोलू शकता. मला भोजपुरीचं त्या वर्षीच बेस्ट अॅक्टर अवॉर्ड मिळालं. माझी जी भाषाच नाही त्या भाषेत मला अवॉर्ड मिळालं."

अशोक सराफ यांनी 'करण अर्जुन', 'कोयला', 'जोरू का गुलाम', 'सिंघम', 'प्यार किया तो डरना क्या', 'गुप्त' अशा अनेक हिंदी सिनेमांमध्ये काम केलं आहे.

तर अभिनेते लक्ष्मीकांत बेर्डे यांनी 'मैंने प्यार किया', '100 डेज', 'बेटा', 'हम आपके हैं कौन' सारख्या हिंदी सिनेमा काम केलं आहे.