जयशी घटस्फोट, अन् आठवडाभरातच माहीच्या आयुष्यात नव्या व्यक्तीची एन्ट्री? लेकीच्या पोस्टने फोडलं बिंग

मुंबई: टीव्ही विश्वातील आयडियल कपल मानले जाणारे जय भानुशाली आणि माही विज यांच्या १५ वर्षांच्या सुखी संसाराला तडा गेला, ही बातमी पचवणं त्यांच्या चाहत्यांसाठी कठीण होतं.

गेल्याच आठवड्यात या दोघांनीही अधिकृतपणे घटस्फोटाची घोषणा करून सर्वांना मोठा धक्का दिला. पण या धक्क्यातून चाहते सावरत नाहीत, तोच आता एका नव्या व्यक्तीची एन्ट्री झाली आहे. माही विजची लाडकी लेक तारा, जय भानुशालीला सोडून दुसऱ्याच एका व्यक्तीला चक्क 'अब्बा' म्हणून हाक मारत असल्याचं समोर आलं आहे.

शनिवार, १० जानेवारी रोजी माही विजने आपल्या इन्स्टाग्रामवर एका खास व्यक्तीसोबतचा फोटो शेअर केला. जयशी वेगळं होऊन अवघा एक आठवडा उलटला असतानाच, माहीने नदीम नावाच्या आपल्या जवळच्या मित्रासोबत केक कापतानाचा फोटो पोस्ट केला. या फोटोपेक्षाही त्याच्या कॅप्शनने लोकांच्या भुवया उंचावल्या.

माहीने लिहिलंय, "वाढदिवसाच्या शुभेच्छा त्या माणसाला, ज्याला मी नशिबाने नाही तर हृदयाने निवडलं आहे. जो मी काहीही न बोलता सर्व काही समजून घेतो... तू माझं कुटुंब आहेस, तू माझी सुरक्षित जागा आहेस!"

खरी चर्चा सुरू झाली ती तारा भानुशालीच्या इन्स्टाग्राम अकाऊंटवरून शेअर झालेल्या फोटोंमुळे. ताराच्या पेजवरून काही फोटो पोस्ट करण्यात आले आहेत, ज्यात नदीमने ताराला प्रेमाने कडेवर घेतलं आहे. या फोटोचं कॅप्शन काळजाचा ठोका चुकवणारं आहे. त्यात लिहिलंय, "हॅपी बर्थडे अब्बा! मी तुमच्यावर खूप खूप खूप प्रेम करते... तुमची तारा."

सोशल मीडियावर हा फोटो वणव्यासारखा पसरला असून नेटकऱ्यांनी प्रश्नांचा भडिमार सुरू केला आहे. "जय भानुशाली असताना हा 'अब्बा' कोण?", "घटस्फोटाच्या जखमा ताज्या असताना माही इतकी घाई का करतेय?", अशा संतापजनक कमेंट्सची लाट आली आहे.

मिळालेल्या माहितीनुसार, नदीम हा माही विजच्या कुटुंबाचा अत्यंत जुना आणि जवळचा मित्र आहे. जय आणि माही एकत्र असतानाही नदीमचा त्यांच्या घरात वावर होता. इतकंच नाही, तर गेल्या वर्षी 'फादर्स डे'च्या निमित्तानेही ताराने नदीमसाठी एक इमोशनल पोस्ट शेअर केली होती. माहीच्या कठीण काळात नदीम तिच्या पाठीशी खंबीरपणे उभा राहिला आहे. पण ताराने त्याला 'अब्बा' म्हणणं मात्र अनेकांना खटकत आहे.

या सर्व वादावर जय भानुशालीने अजूनही मौन पाळलं आहे. जय आणि माहीने आपल्या घटस्फोटाचं कारण स्पष्ट केलं नसलं तरी, १५ वर्षांचं नातं संपल्यानंतर अवघ्या ७ दिवसांत दुसऱ्या व्यक्तीला 'फॅमिली' आणि 'सिक्योर प्लेस' म्हणणं हे अनेकांच्या पचनी पडत नाहीये.