का झाल्या धर्मेंद्र यांच्या 2 शोकसभा? निधनाच्या 40 दिवसांनी हेमा मालिनी यांनी सांगितलं खरं कारण

अभिनेते धर्मेंद्र यांच्या निधनाला जवळपास दोन महिने होऊन गेले आहेत. वयाच्या 89 व्या वर्षी त्यांनी राहत्या घरी अखेरचा श्वास घेतला. धर्मेंद्र यांच्या निधनानंतर बॉलिवूडवर शोककळा पसरली. त्यांच्या कुटुंबासाठीही हा मोठा धक्का होता. चाहत्यांना धर्मेंद्र यांचं शेवटचं दर्शनही घेता आलं नाही. त्यांच्या निधनाची माहिती गुप्त ठेवण्यात आली होती.

निधनाची बातमी गुप्त ठेवण्यात आली, त्यानंतर धर्मेंद्र यांच्या दोन वेगळ्या शोकसभा आयोजित करण्यात आल्या होत्या. धर्मेंद्रच्या पहिल्या पत्नीच्या घरी आणि दुसरी पत्नी हेमा मालिनीच्या घरी दोन वेगळ्या शोकसभा घेण्यात आल्या.

देओल कुटुंबातील जुने वाद अद्याप तसेच आहेत अशा चर्चा सर्वत्र सुरू झाल्या. इतक्या मोठ्या सुपरस्टारच्या निधनानंतर त्यांच्या कुटुंबीयांनी असं का केलं असा प्रश्न तमाम चाहत्यांना पडला होता. अभिनेत्री हेमा मालिनी यांनी या सगळ्या प्रश्नांवर उत्तरं दिली.

ई टाइम्सशी बोलताना हेमा मालिनी म्हणाल्या, "हा आमच्या घराचा खासगी विषय आहे. आम्ही आपसात चर्चा केली होती. माझे जवळचे लोक वेगवेगळे असल्यामुळे मी माझ्या घरी एक प्रार्थना सभा आयोजित केली."

"मी दिल्लीतही प्रार्थना सभा ठेवली कारण मी राजकारणात आहे. तिथे माझा मतदारसंघ आहे. माझ्या मतदारसंघातील मित्र-मैत्रिणींसाठी प्रार्थना सभा ठेवणं माझ्यासाठी आवश्यक होतं."

त्या पुढे म्हणाल्या, "मथुरा हा माझा मतदारसंघ आहे. तिथले लोक त्यांचे ( धर्मेंद्र यांचे ) जबरदस्त चाहते आहेत. त्यामुळे मी तिथेही प्रार्थना सभा ठेवली. मी घेतलेल्या निर्णयावर पूर्णपणे समाधानी आहे."

ज्या दिवशी सनी आणि बॉबी देओल यांनी वांद्रे येथे शोकसभा ठेवली होती त्याच दिवशी हेमा मालिनी यांनी त्यांच्या घरी भजनाचा कार्यक्रम ठेवला होता. बॉलिवूडचे अनेक सेलिब्रेटी सनी आणि बॉबीला भेटून हेमा मालिनी यांना भेटण्यासाठी त्यांच्या घरी गेले होते.