रणवीरच्या Dhurandhar ला मागे टाकलं, या साऊथ फिल्मचे पुण्यातील शो Sold Out, रिलीजच्या पहिल्याच दिवशी हाऊसफुल

रणवीर सिंह अभिनीत 'धुरंधर' हा चित्रपट सध्या बॉक्स ऑफिसवर धुमाकूळ घालत आहे. या चित्रपटात संजय दत्त, आर. माधवन, अर्जुन रामपाल हे कलाकार मुख्य भूमिकेत आहेत. पण अक्षय खन्नाच्या अभिनयाचं सर्वत्र कौतुक होत आहे. एकीकडे 'धुरंधर' धुमाकूळ घालत असताना दुसरीकडे एक दाक्षिणात्य चित्रपट (South Movies) रिलीज झालाय. त्यामुळे आता ही साऊथ फिल्म 'धुरंधर'ला मागे टाकणार असल्याची दाट शक्यता आहे.

'द डेविल' (The Devil) असं या साऊथ फिल्मचं नाव आहे. कन्नड सुपरस्टार दर्शन थुगुदीपा (Kannada Star Darshan) या चित्रपटात मुख्य भूमिकेत आहे. या चित्रपटात दर्शनचा अॅक्शन अवतार पाहायला मिळत आहे. 'द डेविल' या चित्रपटात सुपरस्टार दर्शन एका गँगस्टरच्या भूमिकेत आहे. 55 कोटी रुपयांच्या बजेटमध्ये या चित्रपटाची निर्मिती करण्यात आली होती.

'द डेविल' ही फिल्म 11 डिसेंबर 2025 रोजी थिएटरमध्ये रिलीज झाली आहे. अॅक्शन, ड्रामा आणि थ्रिलर असणारा हा चित्रपट फक्त कन्नड भाषेत रिलीज करण्यात आला आहे. पण तरीही संपूर्ण भारतात या चित्रपटाची चांगलीच क्रेझ पाहायला मिळत आहे.

कन्नड सुपरस्टार दर्शनच्या 'द डेविल' या चित्रपटाचे रिलीजच्या पहिल्या दिवशीच पुण्यातील शो 'बुक माय शो'वर हाऊसफुल दाखवत आहेत. त्यामुळे पुणेकरांमध्ये या साऊथ फिल्मची चांगलीच क्रेझ पाहायला मिळत आहे.

'द डेविल' या चित्रपटाला मुंबईतदेखील संमिश्र प्रतिसाद मिळत आहे. मुंबईतील घाटकोपर, कुर्ला, वाशी या ठिकाणी मल्टिप्लेक्समध्ये या चित्रपटाचे शो लावण्यात आले असून मुंबईकर प्रेक्षकांचा संमिश्र प्रतिसाद या चित्रपटाला मिळत असल्याचं 'बुक माय शो'वर पाहायला मिळत आहे.

'द डेविल' हा बहुप्रतीक्षित चित्रपट रिलीज होण्याआधीच त्याचे 150 अर्ली मॉर्निंग शो कर्नाटकात हाऊसफुल होते. कर्नाटकात 90% हा चित्रपट सिंगल स्क्रिन थिएटरमध्ये रिलीज करण्यात आला आहे. सकाळी 6.30 वाजल्यापासून या चित्रपटाचे शो लागले गेले होते. अॅडव्हान्स बुकिंगमध्येच या चित्रपटाने दणदणीत कमाई केली आहे. आता देशभरात या कन्नड फिल्मचा बोलबाला असल्याचं पाहायला मिळत आहे.

'द डेविल' हा चित्रपट ब्लॉकबस्टर ठरणार आहे. दमदार डायलॉग, कलाकारांचा जबरदस्त अभिनय, तगडी स्टारकास्ट, उत्तम संगीत आणि दिग्दर्शकाची नजर या सर्व गोष्टींमुळे 'द डेविल' हा चित्रपट यशस्वी ठरत आहे.