Mrs. Deshpande साठी सिद्धार्थ चांदेकरलाच का निवडलं? दिग्दर्शकाने सांगितलं 'ते' सीक्रेट, म्हणाले 'तेव्हाच मी ठरवलं...'

मुंबई: हिंदी चित्रपटसृष्टीत आपल्या वेगळ्या धाटणीच्या सिनेमांसाठी ओळखले जाणारे दिग्दर्शक नागेश कुकुनूर सध्या त्यांच्या 'मिसेस देशपांडे' या वेब सीरिजमुळे प्रचंड चर्चेत आहेत. या सीरिजने प्रेक्षकांना खिळवून ठेवलं आहेच, पण त्यातील कलाकारांच्या निवडीवरूनही अनेक तर्कवितर्क लावले जात होते.

नुकत्याच दिलेल्या एका मुलाखतीत नागेश यांनी या सिरीजच्या कास्टिंगमागचा रंजक प्रवास उलगडला असून, मराठीचा चॉकलेट बॉय सिद्धार्थ चांदेकर याला या सीरिजमध्ये स्थान कसं मिळालं, यावरही सविस्तर भाष्य केलं आहे.

नागेश कुकुनूर यांना अनेक दिवसांपासून एका थ्रिलर विषयावर काम करायचं होतं. त्यांना कळलं की एका निर्मिती संस्थेकडे 'ला मांते' या गाजलेल्या फ्रेंच वेब सीरिजचे अधिकार आहेत. नागेश म्हणतात, "मी ती सीरिज आधीच पाहिली होती. त्यातील नातेसंबंधांची गुंतागुंत जर भारतीय वातावरणात मांडली, तर ती प्रेक्षकांना नक्कीच आवडेल असा मला विश्वास होता. म्हणूनच या प्रयोगाला मी होकार दिला."

या सीरिजमध्ये मुख्य भूमिकेसाठी नागेश यांच्या डोक्यात सुरुवातीपासूनच एकच नाव होतं ते म्हणजे माधुरी दीक्षित. "या भूमिकेसाठी असं एक व्यक्तिमत्व हवं होतं, ज्याचं हास्य जितकं सुंदर आहे, तितकंच त्यामागे काहीतरी गडद रहस्य दडलेलं असेल. माधुरीशिवाय हे कोणालाच शक्य नव्हतं," असं नागेश आवर्जुन सांगितलं.

पण सर्वात जास्त चर्चा रंगली ती सिद्धार्थ चांदेकरची. नागेश यांनी सांगितलं की, पोलिस अधिकारी अरुण खत्री यांच्या भूमिकेसाठी प्रियांशु चॅटर्जी हे नाव परफेक्ट होतं. सिद्धार्थबाबत बोलायचं झालं तर त्याला कास्ट करण्यामागे एक खास कारण होतं.

"मी 'सिटी ऑफ ड्रीम्स' पाहत होतो, तेव्हा सिद्धार्थच्या कामात मला एक वेगळीच धार आणि प्रगल्भता जाणवली. त्याचं काम पाहून मी तेव्हाच ठरवलं होतं की, माझ्या पुढच्या प्रोजेक्टमध्ये हा मुलगा असायलाच हवा. 'मिसेस देशपांडे'मधील भूमिकेसाठी मी सिद्धार्थच्या नावावर ठाम होतो," असा खुलासा नागेश यांनी केला.

नागेश कुकुनूर यांनी यावेळी भाषेच्या मुद्द्यावरही आपलं रोखठोक मत मांडलं. अनेक लोक म्हणतात की सिनेमाला भाषा नसते, पण नागेश यांना हे मान्य नाही. त्यांच्या मते, "भाषेची स्वतःची एक लय आणि संस्कृती असते. दिग्दर्शकाला ती लय गवसली पाहिजे. ज्या भाषेवर तुमची पकड नाही, त्या भाषेत उगाच प्रयोग करू नका. जर तुम्हाला भाषेची जाण असेल, तरच तुमची कलाकृती प्रेक्षकांच्या काळजाला भिडते."