प्रसिद्ध अभिनेत्रीसोबत कास्टिंग काऊच, घडलं भयंकर; म्हणाली,'त्याने माझं तोंड धरलं अन्...'

बॉलिवूड अभिनेत्री मौनी रॉय गेल्या अनेक दिवसांपासून मनोरंजनसृष्टीत सक्रीय आहे. छोट्या पडद्यापासून आपल्या करिअरची सुरुवात करणारी मौनी रॉय आता रुपेरी पडदा गाजवत आहे. 40 वर्षीय मौनी रॉयने आपल्या दर्जेदार अभिनयाच्या जोरावर अल्पावधीतच सिने-इंडस्ट्रीत आपलं नाव कमावलं. अभिनयासह मौनी सोशल मीडियावरदेखील चांगलीच सक्रीय असते. अशातच आता अभिनेत्रीने आपल्या करिअरच्या सुरुवातीच्या काळातील एक भीतीदायक अनुभव चाहत्यांसोबत शेअर केला आहे.

मौनी रॉय नुकतीच एका मुलाखतीत म्हणाली की, वयाच्या 21 व्या वर्षी तिला एका भीतीदायक अनुभवानाचा सामना करावा लागला होता. कास्टिंगबाबत घडलेल्या या घटनेनं मौनीला आयुष्यभरासाठी घाबरवलं आहे.

अपूर्वा मुखीजाच्य एका कार्यक्रमात मौनी रॉयने आपल्या भीतीदायक अनुभवाबद्दल भाष्य केलं आहे. मौनी रॉय म्हणाली,"वयाच्या 21 व्या वर्षी मला एका व्यक्तीच्या ऑफिसमध्ये जायचं होतं. या ऑफिसमध्ये मला चित्रपटाची पटकथा ऐकवली जाणार होती. यावेळी एका सीनबाबत मला ऐकवलं जात होतं की चित्रपटातील एक सीनमध्ये एक मुलगी स्विमिंग पूलमध्ये पडून बेशुद्ध होते".

मौनी पुढे म्हणाली,"स्क्रिप्टमध्ये असंही होतं की हिरो त्या मुलीला वाचवतो आणि लिपलॉक करत तिला शुद्धित आणतो. त्यानंतर पुढे त्या संबंधित व्यक्तीने माझं तोंड पकडून बोलायला सुरुवात केली. त्यावेळी माझ्यासोबत काय घडतंय मला काही कळत नव्हतं. प्रचंड भीती वाटत होती, अंगावर शहारे आले होते आणि मी तिथून पळ काढला".

मौनी रॉयने 'क्योंकी सास भी कभी कभी बहू थी' या मालिकेच्या माध्यमातून आपल्या करिअरची सुरुवात केली. त्यानंतर मौनी रॉय 'देवों के देव महादेव' आणि 'नागिन'सह अनेक मालिकांमध्ये झळकली.

मौनी रॉयने 2018 मध्ये अक्षय कुमारच्या 'गोल्ड' या चित्रपटाच्या माध्यमातून आपल्या फिल्मी करिअरची सुरुवात केली. त्यानंतर 'मेड इन चायना' आणि 'ब्रह्मास्त्र' या चित्रपटांच्या माध्यमातून अभिनेत्री प्रेक्षकांच्या भेटीला आली.

मौनी लवकरच 'है जवानी तो इश्क होना है' या रोमँटिक चित्रपटात झळकणार आहे. डेविड धवन दिग्दर्शित हा चित्रपट 2026 मध्ये प्रेक्षकांच्या भेटीला येणार आहे.