'मितवा'मधील अर्णवच्या रिअल लाईफ ईश्वरीची मालिकेत एन्ट्री, 4 वर्षांनी कमबॅक करतेय फेमस हिरोईन

'तू ही माझा मितवा' ही मालिका सध्या छोट्या पडद्यावर प्रेक्षकांच्या पसंतीस उतरत आहे. मालिकेतील अर्णव आणि ईश्वरी यांची जोडी हिट ठरतेय.

अर्णव आणि ईश्वरीचं नातं हळूहळू खुलू लागलं आहे. मालिकेतील ईश्वरीप्रमाणेच अर्णवची रिअल लाईफ ईश्वरी देखील तितकीच सुंदर आहे. ही देखील प्रसिद्ध अभिनेत्री असून आता स्टार प्रवाहच्याच मालिकेत एन्ट्री घेतेय.

अर्णव म्हणजेच अभिनेता अभिजीत आमकर हा प्रसिद्ध अभिनेत्री नक्षत्रा मेढेकरला डेट करतोय. ते अनेक वर्ष रिलेशनमध्ये आहेत. अभिजीत आणि नक्षत्रा आता एका वहिनीवर प्रेक्षकांच्या भेटीला येणार आहे.

स्टार प्रवाहची 'लक्ष्मीच्या पाऊलांनी' मालिका गेली दोन वर्ष प्रेक्षकांच्या मनावर अधिराज्य गाजवत आहे. मालिकेतल्या प्रत्येक पात्राला प्रेक्षकांचं भरभरुन प्रेम मिळत आहे. महाराष्ट्राच्या या लोकप्रिय मालिकेत लवकरच नवा अध्याय सुरु होतोय.

नव्या गोष्टीसह मालिकेत सुकन्या पाटील या नव्या पात्राची एण्ट्री होणार आहे. व्यवसायाने नर्स आणि अनेक गुपितं मनात साठवून शांत आयुष्य जगणारी मुलगी. रुग्णांची सेवा करायला तिला आवडतं म्हणूनच तिने हे क्षेत्र निवडलंय. या निमित्ताने लोकांच्या चेहऱ्यावरच्या आनंदाचं निमित्त होता येतं याचा तिला आनंद आहे. सुप्रसिद्ध अभिनेत्री नक्षत्रा मेढेकर या मालिकेत एन्ट्री घेतेय.

सुकन्या पाटील असं नक्षत्राच्या भुमिकेचं नाव आहे. या मालिकेच्या निमित्तानं अभिनेत्री नक्षत्रा मेढेकर तब्बल 4 वर्षांनी मालिका विश्वात दमदार पुनरागमन करणार आहे.

या भूमिकेविषयी सांगताना नक्षत्रा म्हणाली, "माझ्या करिअरची सुरुवातच मालिकेने झाली होती. त्यामुळे टीव्ही हे लाडकं माध्यम आहे. प्रेक्षकांच्या जगात पुन्हा यायला मिळतंय याचा आनंद आहे."